Pyllait paidbah iaka kot iarap iaki khynnah ïaleh eksam SSLC bala thoh da u Kamphereiei Pala, u top 10 HSSLC ka MBoSE

Syllad | The Rising MeghalayaSeptember 5, 2021

U Chairman jong ka Jaintia Hills Autonomous District Council (JHADC) u Dr Sankey Shangpung haka sngi Saitjain u la pyllait paidbah iaka kot kaba kyrteng ka ‘Curious Brain’ ka kot iarap ne ka question banks na ka bynta ki khynnah kiba pynkhreh ban iakhun iaka eksam SSLC kaba la thoh da u Kamphereiei Pala, uba na ka shnong Moolamylliang, East Jaintia Hills District.

Kane ka kot kadei ka kot ïarap naka bynta ki khynnah kiba pynkhreh iaka eksam ialeh Secondary School Leaving Certificate (SSLC) ne matrik.

Ia kane ka kot la pyllait paidbah haka prorkam pynkup burom iaki samla pule kiba pass bha haka eksam SSLC bad HSSLC ha Moolamylliang UP School.

U Kamphereiei Pala u dei u wei na ki samla uba ju leit skul ha North Liberty Higher Secondary School, Jowai. U Kamphereiei haka jingiakhun eksam HSSLC 2019 ula rung haka thup jong ka First Ten Positions haka Science Stream ka MBOSE bad ula wan haka kyrdan kaba phra.

U Kamphereiei Pala u dei u khun jong ka Kong Kratis Pala bad u Ma Emle Pachiang. U Kamphereiei ula pyndep ïaka matrik jong u na Tluh Secondary School, hynrei hadien ka jingkhangtih dewiong une u khynnah ula jan ban pep skul namar ba hiran ka ïoh ka kot jong ki kmie ki kpa jong u, kiba im ja da kaba bylla tih dewiong.

Hynrei ula bteng iaka jingpule ha North Liberty Higher Secondary School khlem da hap ban siew eiei bad kaba kaba sngewtynnad une u samla ym shym la kut tang haka jingpule doktor, kaba mynta u dang pule ha Guahati Medical College, hynrei ula pynmih da kane ka kot ban ïarap iaki khynnah ban pynkhreh bad ban ioh iaki buit ban pynkhreh iaki eksam.

U Kamphereiei ula pynmih ia kane ka kot haka kata ka dur ba kan long ka kot iarap iaki khynnah ha kawei pa kawei ka lynnong bad buh ruh iaki jingkylli namar ka jingduna ïaka buit ha ka rukom ban pyrkhreh ia ki exam bapher bapher ka ktah iaka jinglah ne ka jingioh marks ki khynnah ha ka eksam.

Ula thoh ia kane ka kot katkum ka jinglap jingshem jong u haka por pynkhreh SSLC bda HSSLC kumjuh ka eksam NEET ka entrance ban ioh leit pule doctor hapoh ka ri.

Kane ka kot kan iarap iaki khynnah ban kynmaw ia kaei kaba ki pule bad leh ha ki skul nalor ban pynrung haka bor pyrkhat iaki lad jingtip kiba thymmai.

Ula ong ba kaba nyngkong ka dei ka anterograde amnesia (ka bor ban kynmaw ia kaba la dep pule ne ban kynmaw iaki lad jingtip ba thymmai) kaba dei ka natural method kaba ki khynnah ki hap ban kynmaw ia kaei kaba ki leh ne pyndep ia kaei kaba ki nonghikai ki ai iaki bad ha ka jinglap jong u kane kam da biang pura ban iakhun eksam.

Ka ba ar ka dei ka retrograde amnesia (ka jingkynmaw ia kaba la dep pule) bad ha ka ne la phiah iaka ha ki ar bynta ka diect bad ka indirect.

Ha ka direct ki khynnah ki dei ban lum iaki jingkylli bad kin shuh peit nuksa, kane ruh kam iarap bad haka indirect pat, ki khynnah ki shait ki pynlang pynlum iaki jingkylli bad lynnong ne analyse bad evaluate kawei pa kawei ka lynnong.

“Ki jingmyntoi kiba ngi ioh na kane ka buit ka dei hadien ba ngi lah dep pynbeit ia ki questions bank ha ka chapter wise pattern kan iarap ia ngi ban tip ia ka jingsam ia ki jingkylli na kawei pa kawei jong ka lynnong jong ka kot, kan airap ban tip ia kiba kumno ki jait jingkylli ki buh bad kiba kum kino ki jait jingkylli kiba ki buh na kawei pa kawei ka lynnong , ia ki marks distribution bad ia ka level jong ka exams. Kumta da kaba don kiba kum kine ki jait kot kaba long ka kot ba nyngkong ha ka MBOSE kaba wan ha kane ka dur  kan iarap bha iaki khynnah ha kaba ki donkam ban apply ia baroh ar kitei ki methods haneng,” la ong u Kamphereiei.

U Kamphereie ula shym la buh satia iaki jubab ha kane ka kot ban pynmlien bad hikai ia ki khynnah ban nym shaniah beit ha kiwei (spoon feed) namar kane kan pynjynjar ia ki khynnah hadien habud bad baroh ki jubab ki don beit hapoh ki kot pule. Da ka ba pynmlien ban wad dalade bad pan jingiarap naki nonghikai kan pynkiew iaki khynnah ha ka jingpule bad kan pynshlur bad kan iarap iaki khynnah haka kam pule puthi jong ki.

Ia kane ka kot lah ban ioh na ki dukan die kot ba paw  ha ka jylla bad lah ban order online ruh na ka Amazon bad Flipkart ha ka dor T.295/-

U Dr Sankey Shangpung ,Chairman ,JHADC  uba long u kongsan ula aiti ruh ia ka jingaisngewbha ban sah jingkynmaw sha u Kamphereiei kaba la pynkhreh da ka Village Education Committee ryngkat Dorbar Shnong  Moolamylliang.