Pyllait paidbah iaka kot sah kynmaw iaka kynthei Khristan kaba nyngkong eh ha Khasi Jaintia

Syllad | The Rising MeghalayaAugust 17, 2024

Kum ka dak ban pynsah jingkynmaw iaka jingrakhe jong ka jingdap 175 snem ka jinglong Khristan ka Nabon Sawian, ka Kynthei Khristan ba nyngkong ha Ri Khasi-Jaintia ban pdiang ia U Jisu Khrist kum U Nongpynim jong ka, ka Jingiaseng Kynthei Khasi Jaintia Presbytery Assembly kala pyllait paidbah iaka kot ‘Souvenir” ba la thoh shaphang ka jingim bad jinglen lade jong ka Nabon.

Ia kane ka Souvenir la pyllait da u Rev SR Dkhar Senior Administrative Secretary Khasi Jaintia Presbyterian Assembly haba pynkut iaka jingrakhe kaba la long haka Wahiajer, Moodymmai Presbytery KJP Synod Mihngi haka 17 bad 18 tarik Nailar.

Ka phang pdeng jong kane ka jingrakhe ka long “Ki Kynthei bad ka Mynsiem jingshakri” bad na ka bynta ban sei iaki kynthei kiba shitrhem haka jingshakri, ka Jingiaseng Kynthei kala buh ruh iaka Topic kaba ong “Ka jingshakri ki kynthei haka hynnin, mynta bad ka lashai” Loukas 4:18.

Shwa ka jingpyllait souvenir, la sdang da ka Jingiaseng ba la ialam da ka Chairperson Jingiaseng Kynthei KJP Assembly ka Kong Sweet Mary Rapthap bad la ioh ka jingpule bad duwai na ka Kong Pyntngen Talang, ki jingkren pdiang na u Rev. H Pale.

Ka Kong Apphira Sylliang Secretary Nabon Jubilee Committee kala iathuh ba iaka jingrakhe dap 175 snem ka jinglong Khristan ka Nabon Sawian, la sdang naduh 19 tarik bad 20 tarik Nailar 2023 haka Balang Presbyterian Nongsawlia, Sohra.

Kala ong ba ha kane ka souvenir ki don ki jingthoh kiba kordor ki ban long ka jingiarap bad jingkyrkhu iaki nongpule. Ka la aikhublei kyrpang ia baroh kiba don bynta haki jingthoh namar khlem ka jong ki yn ym lah ban pynmih iaka thup sah jingkynmaw.

U Rev SR Dkhar Senior Administrative Secretary Khasi Jaintia Presbyterian Assembly haka jingkren ula aijingiaroh iaki longkmie kiba la trei shitom haka kam ka jong U Blei bad pynkynmaw ruh iaka kyntien kaba batai iaka jinglong jong ka kynthei kaba ong, “Ka pyrkhat kum u shynrang, ka leh kum ka kynthei, ka long kum ka khynnah samla bad ka briew kaba don bun ki sap’ bad bynrap ba kine kidei ki jinglong kiba ngi kwah ban iohi haka long rynieng jong ki longkmie.

Hadien ka jingpyllait souvenir la ioh ka jingrwai Choir naka Jingiaseng Kynthei Balang Wahiajer.