Pyllait paidbah iaki ticket lucky draw ka Ladthadlaboh Dorbar Chnong

Syllad | The Rising MeghalayaAugust 22, 2023

Kumba ju long man u snem, ka Ladthadlaboh Dorbar Chnong, Jowai, sa shisien mynta ka kynti ruh kan pynlong biang iaka fete shnong bad ka jingpynkhalai nusip ne lucky draw haka 6 bad 7 tarik bnai Naiwieng (November) 2023 ha madan skul jong ka Ladthadlaboh Secondary School.

Kumta ban pyniaid shakhmat iaka jingdie iaki ticket lucky draw, la pyllait paidbah iaki mynta ka sngi ba Ar ha ka jingialang kaba lyngkot kaba la pynlong ha hall jong ka skul Ladthadlaboh Secondary School.

U MDC ka Jowai North Brightstar Chyrmang, ula long kum u kongsan bad pyllait paidbah ruh ia kine ki ticket lucky draw bad ula kitbok kitrwiang ba kin iaid iew bad ban iaid beit iaid ryntih ki jingthmu ka shnong.

Ka pisa kaba mih na ka lucky draw ka dei na ka bynta ban kyrshan iaka skul ha ka ban siew iaka tulop ki nonghikai skul Ladthadlaboh Secondary School, la ong u waheh chnong ABM Shullai, uba pyniaid iaka jingialang haka jingiadonlang ki riew rangbah ka shnong, ki dkhot ki committee bapher bapher, ki nonghikai skul bad kiwei. La ioh iaka jingkren ai khublei na u ma Embok Phawa Secretary Lucky Draw Committee 2023.

Ki khusnam ne ki prize mynta ka kynti ki kynthup iaka- 1^st Prize- AltoK10, 2nd Prize- T.1 lak bad ka 3^rd Prize – T.10 hajar (san tylli), baroh kalong T.50 hajar.

Ka Ladthadlaboh Dorbar Chnong kala kyntu ia baroh ban ai iaka jingkyrshan iaka shnong da kaba thied ia ki ticket lucky draw bad da kaba iawan sha ka fete shnong khnang ba ki jingthmu ka shnong na ka bynta ban kyntiew iaka pule puthi bad ka roi ka par ka shnong kin long kaba jop.