Pyllait paidbah ka Dorbar Shnong Caroline Colony ïaki Code Bins ban bret ñiut

Syllad | The Rising MeghalayaSeptember 8, 2019

JOWAI: Ka Dorbar Shnong Caroline Colony, kawei na ki shnong kaba don ha sor Jowai kala pyllait paidbah ïaki Code Bins ne ki jaka pynlang ñiut ban pynïakhlad ïaki ñiut kiba pyut bad ki bym pyut ki mih na man la ki thliew ïing ha kane ka shnong.

Ïa kine ki jaka pynlang ñiut ka shnong Caroline Colony kala ïoh haduh 217 tylli lyngba ka Jowai Municipal Board (JMB) bad la sam ïaki sha ki nongshong shnong haka sngi Saitjaiñ haka jingai jinghikai halor ka Solid Waste Management kaba la pynlong da ka Dorbar Shnong lyngba ka Environment & Sanitation Committee.

Ha kane ka jingai jinghikai la ïadonlang ka Kong RS Manner, Chief Executive Officer (CEO) Jowai Municipal Board (JMB) kaba long kum ka kongsan, u Waheh Shnong Dorbar Shnong Caroline Colony Ma AT Gatphoh bad kiwei kiwei ki dkhot ka shnong.

Kine ki Code Bins ki don ar rong, kaba jyrngam na ka bynta ban pynlang ïaki ñiut kiba pyut bad ka rong blue na ka bynta ki ñiut ki bym lah ban pyut. Ïa kine ki niut yn wan lum da ka kali kit ñiut ka JMB arsien shitaiew.

Kong RS Manner kala long ba ri ha pyrthei baroh mynta kila ïakhun ban jop ïaka jaboh plastic namar ba ka sawdong sawkun ka mariang kala shah ktah jur haka jaboh plastic kaba la ktah ïaka koit ka khiah u briew bad ka jingthaw ba im baroh.

Kala kyntu ïa uwei pa uwei u nongshong shnong ba don ka jingkitkhlieh ban wanrah ka jingkhuid jingsuba ka shnong ka thaw bad ban iakhun ban iada iaka mariang.

“Ka Ri India kala sdang iaka aiñ Plastic Waste Management Rules, 2016 bad Solid Waste Management Rules 2016 ban tem ïaka jaboh plastic bad kala khang ban pyndonkam ïaki plastic kiba duna ka jingrben 50 micron bad la khang ban shna ïaki plastic ki bym kdew thikna ïaka jingrben ka plastic,” ong ka kong Manner.

Ha West Jaiñtia Hills U District Magistrate ula pynjari da ka kyndon aiñ 144 CrPC ban ïakhun ïaka jaboh plastic kiba mih na kylleng ki iew namar ba ki wah bad ki wah duid hadien bala hap slap ki shah ktah na ki jaboh plastic kaba ktah ïaka koit ka khiah u briew.
Ha kane ka aiñ kino kino kiba leh pyrshah ki shah dain kuna kynthup ka shah set phatok.

Ka kong Manner kala kyntu ïaki nongshong shnong ban iatreilang khnang ban jop iaka jaboh plastic bad pynshlur ia u paidbah ban pyndonkam da ki pla kot bad ki pla kiba da ka jain bad ki thaw thain da ki skhen ki seij haba leit iew leit hat ne kino kino ki kam.