Pyllait paidbah ka UDP iaka mat treikam, yn khmih biang soskular pynbeit pud Assam Meghalaya

Syllad | The Rising MeghalayaFebruary 17, 2023

Ka United Democratic Party haka sngi Thohdieng ka la wan shakhmat ban pyllait paidbah ia la ka mat treikam (manifesto) kum shi bynta ka jingpynkhreh naka liang ka jong ka ban iakhun ia ka Assembly Election jong ka jylla, kaba ka jingthep u paidbah ia ka vote kan long ha ka 27 tarik mynta u bnai bad ka jingniew ia k vote kan long haka 2 tarik u nai Lber 2023.

Ka mat ba kongsan ha kane ka mat trekam jong ka party ka long baka la kular naka bynta ba kan khmih ne ban peit bniah biang sa shisien ia ka soskular ba la de ban soi ha ka kylla ba nyngkong (MoU) bad ka sorkar Assam haba iadei bad ka jingpynbeit ia u pud u sam katta ia ki 6 tylli ki jaka na ki 12 tylli kiba don ka jingiaher ne ia kajia jong u pud u sam.

Ia kane ka mat trekam la pyllait ia ka da u vice president jong ka party u bah Allantry F Dkhar bad sakhi lang ruh da u MLA barim ka Nongkrem u bah Lambor Malngiang ka President jong ka shnat treikam ki kynthei ka party kong Pretty Pyngrope, kaba wanrah ruh ia ka jingkular ba lada ioh ha ka bor ka thong treikam ka jong ka kan dei ka sorkar kaba lait na ka bamsap bampong.

Kum shi bynta jong ka thong ban pynlong ia ka jylla kaba bit ba bang ha baroh ki liang, ka UDP ka kular ban wanrah ruh ia ki mat treikam ba kham bha kum ha ka liang ka koit  ka khiah, ban kyntiew ia shnat treikam, ban pynbiang ia ki briew ha baroh kawei ka jylla ban lah ban ai ka sumar sukher kaba bha na kiba bha tam ia la u paidbah ka jylla ha ryngkat ka dor kaba bit.

Kum ka party kam lah ban khlem da iaid lait ruh na ka jingsdang ban ngop ne kyrni ki khun samla ha u drok kaba hangne kala buh iaa thong ba kan ieng iakhun ban rat dyngkhong, nalor ban kham ialeh katba lah ban pynduna ia ka jingkhlad bym dei por jong ki khunlung ba dang shu dei ban kha, da kaba yn ialeh ban pynbiang ia ki shlem ai jingsumar  bad ruh ban pynrung haoh ka thup jong ka MHIS.

Haba  iadei bad ka pule ka dangle, ka UDP ka pynkhreh ba kan da thung da ka Education Commission kum shi bynta ban lah ha kaban pyniaid beit pyniaid ryntih ia ka pule ka dangle ha kane ka jylla, ha kaba ka thong jong kane ka long ruh ban kyntiew ia ka rukom ban ai jinghikai, ban da thaw ia ki lad ba lah ban ai jingmyntoi ia ki nonghikai, ban buh ia ka thong ban ialeh katba lah ban pynrung skul ia ki khynnah, ban tem ia ka jingpep skul ba shiteng por bad ruh ban khreh ban kdat sha ka lynti ban pyntreikam ia ka National Education Policy (NEP).

Nalor katta ka UDP ka khreh ruh naka bynta ban iarap ban ai wat ia ki kot pule sha ki  khynnah skul ba wan na ki longiing ba duk (BPL), ban seng ia ki skul ba kyrpang ia ki khynnah ba donkam ia ka jinghikai ba kyrpang bad khlem da klet ban khmih ba ki residential school ki dei ban sdnag ban treikam noh pura.

Haba phai sha ka rep ka riang, ka UDP ka kular ba kan ai iaka song iarap sha kito kiba im sngi ha kane ka jait kam kumjuh kum ha ka liang horticulture, animal husbandry, pisciculture, apiculture, floriculture, food processing, nalor katta an khreh ban thaw ruh ia ki skhim  ba lah ban wanrah ia a bha ka miat ki paid nongrep bad ruh ban don ia ka kymhun ban khmih ia ka dor  ka mur ban ia im lang ne ka minimum support price.

Haba phai sha ka shong suk shong sain, ka UDP ha ka mat treikam ka jong ka, ka buh ia ka thong ban nang pynkhlain shuh shuh ia ka tnat pulit da kaba thep lut ia baroh ki post kiba lait, nalor ka jingkhreh ban da buh noh sa kawei ka kynhun kaban khmih bad peit thik tang ia ki thain khappud kampher lada dei hapdeng bad ki jylla ne ka ri a marjan.

Haba iadei bad ka jingdawa pyntreikam ia ka Inner Line Permit (ILP), ka UDP ka sngew ba donkam ban pynkhlain ruh artad ia ki ain ki kanun ba la don lypa kum ka Meghalaya Residents Safety and Security Act.

Halor ka kam ban ioh jingithuh ia ka kten Khasi bad Garo da kaba pynrung haka 8th Schedule ka Constitution ka ri  India, ka UDP ka kam ba kan buddien ia ka da kaba pynshong nongrim ruh ia ka resolution ba la dep ban diang a dmynjur da ka iing dorbar tawain ka jylla.

Kiwei kiwei ki mat ki jur ba kum ka party ka pynpaw ba ka kloi ba kan pyntreikam lada ka wan ha ka bor ban synshar ka long baka MMDR Act ka dei ba kan lah ban kdup lang ruh wat ia ki paid nongkhaii kiba rit bad ban iaid lang ryngkat ka jingpynneh ia ka mei mariang.

Ka ban jur ruh halor ka mat ban kyntiew ia ka tourism da kaba ialeh ban phai khmat lang ruh sa sha kiwei pat k bynta jong ka kum ka medical tourism bad kiwei kiwei, bad ha ka juh ka por ban wanrah ia ka rukom treikam kaba thymmai ha ka shnat treikam jong ka MTDC.

Ha ka liang jong ka bording, ka UDP ka uh ia ka thong ban khreh ban wanrah ia ki mat treikam kiba thymmai ha ka MeECL bad ban ialeh ban pynbiang ia ka jingdonkam ia ka bording ha ka jylla hi baroh kawei.

Ban kyntiew lem ia ki khun samla yn plie lad ia ki da kiba bun ki buit treikam da kaba ialeh ban kyrshan ia ki ban ieng hala ki jong ki kjat, ia ki samla ba don sap ha ka sports yn ialeh ban seng ia ki shlem ai jinghikai, ban ai buit ai bor ai mynsiem ia ki samla ba don ruh ka sa ha ka liang ka rwai ka siaw ka put ka tem, ki kam pynneh ia la ki la riti.

Halor a mat jong ka jingbym ioh kam ioh jam, ka UDP ka kular ba kan shim khia ia ka da kaba seng ruh ia ki shlem ai jinghikai (coaching centres) ban thep lut ia ki kam ba lait ha ka sorkar, ban buh noh daka por ia ka jingynrung kam ka MPSC, ki DSC bad ban khmi bniah biang sa shisien iaka rta ban rung kam.