Pyllait paidbah u CM ia ki kali kit nongpang jong ka PA Sangma International Medical College

Syllad | The Rising MeghalayaFebruary 6, 2025

U Myntri Rangbah ka Jylla u Conrad K Sangma ha ka 6 tarik Rymphang u la pyllait paidbah ia ki kali kit nongpang jong ka PA Sangma International Medical College & Hospital (PIMC) ha ka jingiadon lang ka Myntri ka ka Tnad ka koit ka khiah ka Kong Ampareen Lyngdoh, u Chancellor ka USTM u M Hoque bad kiwei kiwei. 

Ki jingshakri lyngba kine ki kali ki long ban iarap ban kit ia ki nongpang bad ki nongap pang kiba wan sha ka hospital khnang ban pynthikna ban ioh ia ki lad jingsumar kiba biang, kata la ka dei na ki jaka nongkyndong ne ki jaka sor kumjuh.

Haba kren ha ka jingialang, u CM u la pyrto ia ka PIMC halor ka sienjam kaba ka la shim da kaba ong, “Kane ka dei ka phang kaba kongsan bha ba la shim da ka PIMC. Wat hapdeng kiba bun ki jingeh haba seng ia ka medical college, kane ka skulbah ka la shim ia ki sienjam ban kyntiew halor ka jingpynioh ia ki lad jingsumar kiba bha tam. Kine ki kali ym tang ba kin pynmyntoi ia ki briew na ki thain nongkyndong hynrei kan pynkhlain ruh ia ki lad jingsumar ha Shillong bad kiwei kiwei ki jaka.”

Na ka liang ka Kong Ampareen Lyngdoh ha ka jingkren ka la kdew halor ki jingmyntoi kiba plie lyngba kiba kum kine ki sienjam ki ban aijingmyntoi shibun ia ki paidbah ha ka liang ka koit ka khiah.

“Ka leit ka wan ka dang dei ka mat kaba shem jingeh ha ki por kiba donkam kyrkieh ban ioh ia ki lad jingsumar ha ka por kaba biang. Ka jingioh ia kine ki kali kan wanrah ia ka rukom treikam kaba ryntih ban pynsuk ia ka leit ka wan jong ki nongpang khamtam eh na ka bynta kito kiba dei na ki thain kiba dang duna ki lad jingshakri,” ka la ong.

Ka jingai jingshakri kan sdang lyngba kine ki 10 tylli ki kali, kata san tylli kiba la mang kyrpang na ka bynta ki thain nongkyndong bad san na ka bynta ki jaka sor kaba kynthup ia ka Shillong. Ia mynta artylli na kine ki kali kin treikam hapoh Shillong.

Khnang ban pynsuk bad pyniaid beit ia ka jingai jingshakri lyngba kine ki kali, ka PIMC ka don ruh ia ka jingthmu ban pyndonkam da ki mobile application ka ban pynsuk ia ki nongpang ba kin pyntip lypa halor ka jingdonkam kali.

Lyngba kane ka sienjam ka PIMC ka thmu ban pynkhlain ia ka bynta jong ka kum ka jaska sumar kaba pynleit jingmut bad ban pynthikna ba ki lad jingsumar ka dei kaba lah ban ioh da baroh.