Pyllait paidbah u Kyrmen Shylla iaka kali kit nongpang ka shnong Rangad

Syllad | The Rising MeghalayaAugust 15, 2022

U Myntri sorkar uba long ruh u MLA ka Khliehriat u Ma Kyrmen Shylla ula pyllait paidbah ïaka kali kit nongpang (Ambulance) jong ka shnong Dorbar Shnong Rangad, East Jaintia Hills District haka sngi Nyngkong.

Ïa kane kali kit nongpang la pynïoh lyngba ka jingkynshew pisa na ka Dorbar Shnong Rangad bad ka jingsynniang na u MLA ka thaiñ.

U Ma Kyrmen Shylla haka jingkren ula ai ka jingiaroh iaka Dorbar Shnong ka bym shym la ap tang na ka jingai jong u hynrei ka ai ïatreilang ban pynïoh ïaka Ambulance. Ula kyntu iaki nongshong shnong ban sumar iaka kali bad ban pyndonkam hok iaka, ban myntoi ka shnong ka thaw.

Nalor u MLA la iadonlang ruh u General Secretary 12 Shnong Welfare Association u Tyrnit Pdeiñ, u General Secretary ka 7 Shnong Welfare Association u Bisharbha Rymbai, u Waheh Shnong u Damon Lamo, u Secretary Shnong Ripos Lyngdoh bad kiwei ki riew rangbah kiba shah khot sngewbha nalor ki nongshong shnong.

Ha kane hi ka sngi ka Dorbar Shnong ka la sam ïaki jingai sngewbha sha ki nongshong shnong kiba don iaka jingduna haka bor met.