Pyllait paidbah u MDC Saphai lai tylli ki Ambulance, kawei iaka Psiar, Khatkasla bad Moolber

Syllad | The Rising MeghalayaMay 6, 2021

U MDC jong ka Saphai u ma Habahun Dkhar ula pyllait paidbah lai tylli ki kali Ambulance haka thain jong u haka jingialang kaba long ha ki lai jaka ha Psiar, Iooksi bad Saphai haka sngi Balang.

Kan dei ka sien kaba nyngkong haka history ba u MDC na katei ka thain un theh shisien theh iaki lad jingiarap sha u paidbah, khamtam kum ka shnong Khatkasla, Psiar bad Moolber kiba don ha khappud Meghalaya Assam kiba la shah shitom la phew phew snem ban ioh kum kine ki skhim. Kine ki shnong da ki phew tylli ki snem kila im hadpeng ka jingsyrtok ban iaid da ka kjat na ki shnong jong ki sha Sahsniang PHC ban ioh iaki jingsumar.

Hynrei ka jingioh ka JHADC iaka skim Special Assistance Grant (SAG) kala pynlong iaki MDC ban ioh ka lad ban shakri ban pynioh ki lad jingiarap ia u paidbah ha kiba bun ki bynta mynta ka kynti. Kine ki ambulance ruh ki dei kiba la bei pisa lyngba ka SAG jong u snem 2019-20.

Nalor ka shnong Psiar, Khatkasla bad Moolber, kiwei ki shnong kiba ioh myntoi na ki ar tylli ki ambulance ki kynthup iaka Ïooksi Ïapkhla, Ïooksi Kyanmynsar, Ïooksi Tongkiad, Priang, Umdilien, Saphai bad Ïawthymme.

U Ma Habahun Dkhar haba kren haka jingialang ha Psiar ula ong ba bun ki nongshong shnong ki ju pyntip ia u ba ki shem shitom ban ioh kali ban leit ban wan khamtam haka pang ka shitom. Ula ong ki don ki ba ioh iaki number phone jong u, ki phone bad bunsien u hap ban leit buh bad leit shaw iaki nongpang na ki jaka sumar haba kim ioh iaki kali motor ha kane ka thain kaba dang sahdien ha baroh kiliang.

“Kane ka jingshitom u paidbah kala pynlong ia nga ban mang iaki kali kit nongpang lyngba ka SAG ha kane ka thain. Nga ngeit skhem ba kine ki kali kin ai jingmyntoi ia phi haka pang ka shitom bad pyndonkam hok iaki khnang ban myntoi u paid nongshong shnong salonsar,” la ong u ma Habahun.

Ki waheh shnong kiba iadonlang ha ki jingialang pyllait paidbah ia kine ki kali ki dei naduh u Mynta Synnah Waheh Shnong Psiar, u Anthony Bareh Waheh Shnong Saphai, u C. Tangliang Waheh Shnong Ïooksi Ïapkhla, u Nangaibormi Sutnga Waheh Shnong Umdienlieñ.

Baroh ki ki waheh shnong kila pynpaw ka jingsngewnguh ia u MDC ka thain uba la iohi iaka jingeh u paidbah ka thain.

“Kane ka thain jong ngi, uba bun hi u nongshong shnong dei uba duk bad ka jingwan kine ki ambulance ka long ka jingkyrkhu ba kin ioh ban poi biang por sha ki jaka sumar bapher bapher,” la ong u ma Nangaibormi Waheh Shnong Umdienlieñ.