Pyllait Sorkar T.16.92 lak ka pisa iarap sha lanot shoh phria ha ki san shnong ha West Jaintia Hills

Syllad | The Rising MeghalayaDecember 20, 2024

Ka ophis u Deputy Commissioner, West Jaintia Hills ha ka 19 tarik Nohprah ka la pynlong ia ka prokram hapoh ka conference room na ka bynta ka jingpyntip bad aijingiarap sha kito ki longiing kiba ki iing ki sem jong ki bad ki marep ki la shah pynjulor na ka jinghap phria kaba jur kaba la jia ha ka 5 tarik u Naiwieng ba la dep.

Ha kane ka prokram la iadon lang ruh u MLA ka thain bad Chairman ka MUDA u Bah Wailadmiki Shylla, Kong HML Kynta, Additional Deputy Commissioners, Dr. Heimonmi Niang BDO Thaddlaskein C&RD Block, u Bah P Passah, BDO Namdong C&RD bad kiwei kiwei.

Haba aijingkren u Bah Wailadmiki u la kdew ba ka jingthmu ba kongsan jong kane ka prokram ka long ban aijingkyrmen hapdeng ki longiing bad ki nongrep bad ban pynskhem ia ka jingangnud jong ka sorkar ban weng ia ka jingeh jong ki. U la batai bniah ba ia ka pisa jingiarap la sam katkum ka jingbishar bniah ia ka jingshah pynjulor kaba kawei pa kawei ka longiing ka la mad.

U la ban jur ruh ia ka jingshimkhia jong ka sorkar ban iarap ia ki longiing kiba la shah ktah ban maramot ia ki iing ki sem jong ki. U la pynthikna ia ki nongwan iashim bynta ba ia ka pisa jingiarap la mang katkum ka jingbishar bniah ia ki jingshah pynjulor, ban pynthikna ia ka jingsam kaba hok bad kaba iadei dur.

U la kubur ba ka jingiarap kaba long T. 4000/- lada ai ka lah ban duna ban ia kaba la khmih lynti, hynrei u la ong kan iarap ha kawei ka rukom ban lah ban weng mardor ia ki jingeh ba kyrkieh. U la kyrpad ruh ïa ka bor synshar district ban pynkloi ban pyllait ia ki jingiarap sha ki nongioh jingmyntoi, ha kaba la pynthikna ba ia kane ka kam yn pyndep ha ka taiew kaba ar jong u bnai Kyllalyngkot 2025.

Nalor kata u la pynbna shuh shuh ba ki nongrep kiba ki mar rep jong ki, ki la shah pynjulor ha u phria shen kin sa ioh ia ka jingiarap pisa kaba long T. 8500/- shi hectare bad kaba lah ban kham bun  katkum ka jingheh jong ka jaka rep jong ki, da kaba pyntip ba kane ka lah ban shim katto katne por namar ba ia ka jingtyrwa yn phah sha ka sorkar ban ai ka jingmynjur.

Katba ka Kong HL Kynta, Additional Deputy Commissioner ka la pyntip ba u phria ba dang shen u la ktah ia ki san tylli ki shnong kiba kynthup ia ka Iongnoh, Pynthorlangtein, Muphlang, Mustem, Madan Tyrpait. Baroh ki don 113 tylli ki longiing ha kitei ki shnong kiba la ithuh ba ki la shah ktah bad ka sorkar ka la pynbna ban ai jingiarap mar T. 4000/- na ka bynta kawei kwei ka longïing kaba yn thep sha ka account jong ki nongïoh jingmyntoi lyngba ka direct online transfer. Kane ka song pisa ka long baroh T. 4,52,000/-. 

Ka la  pyntip ruh ba ka tnad ka rep ka riang ka la pynlong ia ka jingjurip kaba bniah ban bishar ia ka jingjulor jong ki jingthung jingtep na ka jingther jong u phria. Ka pyntip ba katkum ka jinglap la mang ia ka song pisa ka kot baroh sha ka T.12,40,150/-  kum ka jingiarap.

Katba na ka liang u BDO ka Namdong u Bah P Passah  bad u Dr. Heimonmi Niang, BDO Thdlaskein ki la kyntu ia ki nongioh jingiarap ba kin pynthymmai ia ki bank account jong ki bad ban pyndep ia baroh ki jingdonkam kumba la batai da ka bank, khnang ban lait na ka jingpynslem ban ioh ia ka pisa jingiarap.