Pyllait u CM ia ka GREEN Meghalaya naka bynta ki kam pynroi bad iada mariang

Syllad | The Rising MeghalayaOctober 2, 2024

U Myntri Rangbah ka Jylla u Conrad K Sangma ha ka 1 tarik Risaw u la pyllait paidbah ia ka GREEN Meghalaya plus scheme da kaba pynpaw ruh halor ka jingdonkam ban pyniabiang ha kaba iadei bad ka roi ka par bad ki lad jingiada ban pynneh pynsah ia ki khlaw ki btap bad ka mei mariang.

Ka GREEN lane Grassroot level Response Towards Ecosystem Enhancement and Nurturing ka dei kaba la pynshong nongrim halor ka bynta jong ka jingsiew na ka bynta ban iada ia ka mariang (Payment for Ecosystem (PES), ban kyrshan ia ki shnong ki thaw, ki kur ki jait kumjuh ia ki riew shimet kiba don ia ka jingkut jngmut ban pynneh pynsah bad aijingiada ia ki khlaw ki btap ka ban long la kumno kumno haduh 30 snem kynthih.

Haba kren ha ka jingpyllait ia kane ka skhim, u CM u la ong, “Ka dei ka jingmyntoi jong ki paidbah, ka imlang sahlang bad ka pyrthei ba ka PES Programme ka dei ia ka ban pyntreikam hapoh ka ri bad ka pyrthei namar ka dei ka kam kaba dawa kyrkieh. To ngin iada ia ki khlaw ki btap hashwa ba kin julor, ym ban pynkhie im biang hadien ba la julor. Kane ka dei kata ka jingmut jong ka GREEN Meghalaya bad ngi da sngew sarong ia kane ka flagship programme. Dei na kata ka daw ba ngi kwah ban wanrah ia kata ka Green Meghalaya Plus’, ka ban dei kawei na ki prokram ba kongsan bha.”

Kawei na ki jingkylli kaba kongsan tam ha ka PES 2.0 guidelines ka dei halor ka jingpyniar ia ka jaka ban iashim bynta ha ka ban aijingiada ia ki khlaw ki btap, kata ha kaba ha ka skhim kaba hashwa ka donkam ia ka jaka khlaw kaba ha ka jingheh kaba haduh 2 hectare, hynrei ha kane ka kyndon kaba mynta la pynhiar sha ka 1 hectare ka ban plielad ia ki trai jaka bad ki shnong ki thaw ba kin ioh ban pyndonkam lyngba kane ka skhim. Kane kan pynthikna ruh ba ka jingioh nong lyngba kane ka skhim kan leit sha kham bun ki nongshong shnong bad ka ban noh synniang kham bha ha ka jingiada bad pynneh pynsah ia ki khlaw ki btap ha ka jylla.

“Kane kam dei satia tang halor ka mariang kaba ngi kren hangne. Ka jingai jingiada ia ki khlaw ka long kaba kongsan na ka bynta jong ngi wat na ka jingsngew jong ka Finance Commission,” ong u Conrad. Ha ka por ba la kren halor ka jingsam ia ka bhah khajna ka Sorkar Pdeng bad sorkar Jylla, kaba dei ka bynta kaba ka Finance Commission ka leh, ka jingdon jong ki khlaw ka dei kaba kongsan tam ha ka jingioh lum khajna jong ka Sorkar Pdeng. Katba ngi la ai pisa ban kyntiew halor ki lad jingiada ia ki khlaw ki btap bad ka mei mariang, ym tang ba ngi iada bad pynneh pynsah ia ki khlaw ki jong ngi, ym tang ba ngi pynthikna ia ka mariang hynrei ka wanrah ruh ia ki jingmyntoi ha ka liang ka jingmih pisa. Ka dei ka jingmyntoi bad ka jingjop na ka bynta baroh,” u la bynrap.

Kumjuh ha kane ka prokram u CM u la iakren ruh bad ki nongioh jingmyntoi lyngba ka GREEN Meghalaya+, CM ELEVATE, bad FOCUS ha kaba uwei na ki nongioh jingmyntoi napoh South West Khasi Hills u la iathuh ia ka jingshem ka jong u bad ai khublei kyrpang ia ka sorkar Meghalaya halor ka jingplie lad plie lynti ha kaba iadei bad ka kam thung dieng bad ka jingpynneh pynsah ia ka mariang lyngba kine ki sienjam ba la pyntreikam da ka sorkar.

Ha kane ka prokram u CM u la sam ruh ia ki cheque bad sanction letter sha ki nongioh jingmyntoi jong ka FOCUS, CM-Elevate, bad GREEN Meghalaya+. Lah ruh ban kdew ba ka CM-ELEVATE Phases 1 bad 2 ka la aijingmyntoi ia haduh 2281 ngut ki briew lyngba ka jingmang kaba kot haduh T.60 klur, katba ka FOCUS ka la kyrshan ia 3777 ngut ki nongioh bynta  lyngba ka song pisa kaba kot sha ka T.17.59 klur.