Pyllait u CM iaka guidebook CM IMPACT ba duna ka jingpass ki khynnah ha ki eksam ha ka Jylla

Syllad | The Rising MeghalayaOctober 3, 2024

Ban weng ia ka jingeh namar ka jingduna jong ki khynnah kiba pass ha ki eksamin ha ka Jylla Meghalaya, u Myntri Rangbah ka Jylla u Conrad K Sangma u la sdang ia ka sienjam na ka bynta ban aijingkyrshan ia ki khynnah pule kumjuh ki nonghikai bad ki kmie ki kpa da kaba pyllait paidbah iaka guidebook CM IMPACT na ka bynta ki khynnah SSLC.

Shibynta jong kane ka jingtuklar, u CM ka Jylla ha ka 3 tarik Risaw u la pyllait paidbah ia ka jingtreikam jong ka CM IMPACT na ka bynta ka Rilum Garo ha ka jingiadon ryngkat lang u Myntri ka Tnad pule puthi u Rakkam A Sangma.

Shi bynta jong kane ka CM IMPACT, ka Tnad pule puthi kan pynioh ia ki Guidebook na ka bynta ki khynnah pule, nonghikai ka ban long ha ka dur jong ka app ka ban pynthymmai man ka por. Nalor kata yn pynbiang ruh ia ka Intranet ha ki block na ka bynta ka jingioh pyndonkam kaba kham biang.

Haba sam ia ki Guidebook sha ki nonghikai, u CM u la ong ba ka long kaba kongsan na ka bynta baroh kiba don bynta ban iakynduh man la ka por ban iamir jingmut bad ban pynkhreh ha ka por ba biang ia ki lad ki lynti ban tuklar ia kane ka jingeh.

Da kaba kubur halor ki jingeh kiba shakhmat ban tehlakam ha ka liang ka pule puthi, u Conrad u la ong, “Ngin hap ban law ia ki jyrwit jyrwat bad ban iaid shakhmat ha ryngkat ka thong.Ngi la don ia ka jingthmu ban kyntiew ha ka liang ka pule puthi. Ka jingthmu ba kongsan ka long ban kyntiew bad pynbha ia ka bynta jong ka pule puthi bad ia ka jingpass bha jong ki khynnah.”

U la kyntu ruh ia ki nonghikai ba ki dei ban weng ia ki jingeh ban kyntiew ia ka jingpass bha jong ki khynnah bad ban shimkhia bha ha kaba iadei bad ki jingpule ki jong ki. U la kyntu ruh ia ki nonghikai ba kin phiah ia ki khynnah pule ban lap ia ki jingduna jong ki bad ban trei ban pynbha bad kyntiew ha ka jingioh marks jong ki. U la ban jur ruh ia ki nonghikai ban pynlong ia ki khynnah kiba la pynkhreh bha khnang ba kin lah ban pass ha ki eksam jong ki.

U CM u la bynrap ruh ba ka sorkar ka la rai ban pynlong ia ki supplementary ekam hapoh 2 bnai naduh ba la pynbna ia ka result jong ka Secondary khnang ba kan plielad ia ki khynnah pule ban pyndep ia ki eksam jong ki khlem da duh ei shi snem.

U Myntri ka tnad pule puthi u Rakkam Sangma ha ka jingkren u la ban jur halor ka jingeh kaba iadei bad ki nonghikai ba la shu thung pateng ne ‘proxy teacher’ bad kyntu ia ki nonghikai ba kin long kiba shimkhia ban shakri ia ka imlang sahlang.