Pyllait u CM ka jylla iaki kali bad thuk thuk na ka bynta ki Pulit

Syllad | The Rising MeghalayaNovember 25, 2023

U Myntri Rangbah ka Jylla u Conrad K Sangma ha ka sngi Thohdieng ba la lah ula pyllait paidbah iaki 80 tylli ki Bolero, 140 tylli ki thuk thuk bad 6 tylli ki crane khnang ba kan lah ban ai ia ka jingshakri kaba kham biang shuh shuh.

“Kine ki kali  kin iarap bad pynsuk shibun ia ki bor pulit ha kaba iadei bad kaleit ka wan, ka iarap ban pynsted ha ka jingpyndep ia ka kam bad jingshakri ba kham bha shuh shuh na ka bynta ki paidbah hapdeng kino kino ki jingeh, kata da kaba pynpaw ruh halor ka bynta kaba kongsan jong ka Tnat pulit ha ka imlang ka sahlang,” ong u Conrad Sangma.

Ia kane u CM u la pynpaw ha ka jingialang ha ryngkat ka jingiadon lang u Symbud Myntri Rangbah uba khmih ia ka Tnat kam pohiing, u Bah Prestone Tynsong, bad u Symbud Myntri Rangbah u Bah Sniawbhalang Dhar, Myntri ka Koit ka Khiah ka Kong Ampareen Lyngdoh nalor kiwei pat ki heh sorkar.

Halor ka bynta jong ka Tnat pulit ha ka kam pyniaid kali (Traffic), na ka liang u CM u la ong ba ka jinglah ban pyndep noh shen ia ka jingtei ia ka iingdorbar Assembly ha New Shillong, Mawdiangdiang, kumta ruh kan don ka jingpynkynriah ia ki tnat treikam bapher bapher sha New Shillong kumjuh, bad kumta ruh kan don ka jingduna ha ka jingkhapnigah hapoh ki jaka sor bad na ka liang ka Tnat Traffic ka jong ka Tnat Pulit ka don ia ka bynta kaba khraw ban shim halor kane ka bynta.

Katba na ka liang u Bah Prestone ha ka jingkren u la ong ba nalor ki lad jingiarap ia ka tnat pulit, na ka liang ka sorkar kan don ruh ka jingangnud ban ai ka jingkyrshan halor kiwei pat ki bynta jong ka jingtreikam, kata ban pynlong ia ki bor pulit kiba don ia ka bor met bor phad  bad ka bor jabieng kaba khlain.