Pyllait u Myntri ia ka theme song bad u mascot na ka bynta ka jingplie ia ka 6th Meghalaya Games

Syllad | The Rising MeghalayaJanuary 13, 2025

U Myntri ka tnad Sports & Youth Affairs u Bah Shakhliar Warjri ha ka 13 tarik Kyllalyngkot u la pyllait paidbah ia ka theme song bad ka video kumjuh ia u mascot “U Kiang’ na ka bynta ka 6th Meghalaya Games ha ka jingplie pyrda ba la pynlong hapoh District Library Auditorium, Mynthong, Jowai.

Ka theme song “Niom Beit Naphang” ka la pynkhih ia ki mynsiem jong ka jingiatylli hapdeng ki nongialehkai, katba u Mascot “U Kiang” ka pynpaw ia ka mynsiem jong ka jingiakhun laitluid.

Ha kane ka jingialang la ia don lang ruh u MLA ka thain uba dei ruh u Chairman ka MUDA bad Adviser ka District level Organising Committee u Bah Wailadmiki Shylla, Working president ka Meghalaya State Olympic Association (MSOA), u John Kharshiing, Secretary ka Sorkar Meghalaya ka Kong Matsiewdor War Nongbri, General Secretary ka MSOA u Bah Finely Pariat, Deputy Commissioner  Bah B.S Sohliya, IAS, Superintendent of Police Bah C.Syrti MPS,  ki rangbah shnong na ki shnong bapher jong ka sor Jowai bad kiwei kiwei.

Haba aijingkren ha ka jingialang u Myntri ka Tnad Sports u la ban jur halor ka jingkongsan ha ki kam bei tyngka na ka bynta ki jingtei ia ki jaka ialehkai sports bad ka jingkyntiew ia ki samla da kaba ong ba ki kam ialehkai sports ki wanrah ia k jinglong discipline, ka tei ia ka jinglong jong u briew bad wanrah ka jingiatylli hapdeng ki samla.

Da kaba ithuh ia ka bynta jong ki kam ialehkai sports ha ka ban tei ia ka imlang ka sahlang, u Bah Shakliar u la ong ba ka sorkar jylla ka la buh hakhmat na ka bynta ki jingtei ia ki jaka ialehkai sports bad kumjuh ban bei tyngka ia ki Sports Association ha ka jylla.

U la ong ruh ba ka sorkar ka la pynleit jingmut ban pyntreikam ia ki jingdonkam kiba la dep don lypa ha ki skul bad ki college ha ka jaka ban tei ia ki jaka ialehkai kiba thymmai, kata da kaba buh hakhmat ia ka thong ban kyntiew shuh shuh ia ki jaka ialehkai kiba la don lypa namar kane ka jingpynlut kan iarap shibun ia ki jaka pule, ki shnong ki thaw wat hadien ba la kut ki lympung jingialehkai.

Nalor kata u Bah Shakliar u la kdew ruh shaphang ka jingiohi jngai jong ka sorkar ban pynkup bor ia ki samla ba kin kiew shaphrang ha ki kam ialehkai sports ym tang hapoh ka jylla hynrei wat ha ki rynsan iakob hapoh ka ri. Da kaba kubur halor ki jingkylla kiba lah ban shim por ban pynurlong ia ka jingthmu, hynrei u pynthikna ba na ka liang ka sorkar kan shimkhia ban saindur ia ki nongialehkai bad ban khmih na ka bynta ka jingkiew ka jong ki ha baroh ki liang.

U Myntri u la pyrto ruh ia ka jingtrei shitom ki ophisar sorkar, ki nongialam shnong bad ki kynhun seng jong ki shnong ki thaw ban aijingkyrshan ia kane ka jingiohi jngai jong ka sorkar, bad u kitbok kitrwiang ruh ia baroh ki nongialehkai kiba pynkhreh iashim bynta ha kane ka lympung ialehkai.

Hadien kane na ka liang u Myntri ka tnad Sports ha ryngkat u MLA ka thain u Bah Wailadmiki bad ki nongpyniaid ki la pynlong ka jingjurip ia ki katto katne ki jaka ialehkai ban khmih ia ka jinglong jingman ha ka jingpynkhreh na ka bynta ban pynlong ia ka lympung ialehkai National Games ka ban wan.

Na ka liang ka kynhun Elev8 Tribes Choir kala rwai ia ki ar tylli ki jingrwai kiba la pynhun mynsiem ia baroh kiba la wan ban sakhi ha kane ka sngi.