Pyllait u Myntri ia ki 18 tylli ki kali kit bad test dud ba la ai sha ki Society

Syllad | The Rising MeghalayaSeptember 6, 2023

U Myntri ba khmih ia ka tnat Animal Husbandry & Veterinary, u Bah A L Hek haka sngi Balang u la pyllait paidbah ia ki 18 tylli ki kali kit dud bad kali ban test ia ka dud ia kiba la aiti da ka Directorate of Dairy Development  lyngba ka NPDD sha ki 18 tylli ki Dairy Co-operative Society ha ka jingialang kaba la long ha Central Dairy Campus, Mawiong.

Na ka liang u Myntri haba kren ha ka jingialang ula pynpaw ba ka jingpynmih dud hapoh ka Jylla ka dang dei kaba dang shu sdang ban iaid shakhmat, kumta ruh u  pynshlur ia ki briew ba kin trei ia kane ka kam pynmih dud khnang ban nang lah ban kyntiew ha kaba iadei bad ka jingpynmih bad ban lah ban kyrshan bad ban pynbit pynbiang ia lade.

Ha kajuh ka por u khot ruh ia ki kynhun treikam shimet ba kin ai ka jingiatreilang bad ka sorkar khnang ban lah ban kyntiew ha kaba iadei bad ka jingpynmih dud bad ruh ban plielad ha ka liang ka ioh kam ioh jam na ka bynta ki samla.

Ha kane ka prokram na ka liang u Myntri u la aiti ruh ia ki shabi sha ki Dairy Co-operative Society bad kaweh ruh ia ka lama kum ka dak jong ka jingpyllait ia ki ha kane ka jingialang.

Kiwei pat kiba la ia don lang ha kane ka jingialang ki kynthup ia u Dr Manjunatha C, Secretary, A.H & Veterinary Department, L S Shangpliang, Director, Dairy Development bad kiwei kiwei.