Pyllait u Myntri ka tnad liengsuin iaka Seaplane ha pung Umiam ha ka jingiadon lang u CM ka Jylla

Syllad | The Rising MeghalayaNovember 14, 2024

U Ministry ka Civil Aviation u Kinjarapu Ramohan Naidu ha ka 14 tarik u Naiwieng u la wan ban pyllait ia ka iaki liengsuin Seaplane kaba lah ban her ha suin bad ha um ha ka jingpyrshang hapoh ka pung Umiam, Ri Bhoi District ha ka jingiadon lang u Myntri Rangbah ka Jylla u Conrad K Sangma. 

Ha ka jingkren une u Myntri u la ong, “Ka India ka don haduh kumba 1300 tylli ki dewlynnong, ki jaka um kiba kynthup ia ki wah, ki pung bad ki jaka khap duriaw kiba long ka daw kaba kongsan ban pyndonkam ia ki Seaplane na ka bynta ban kyntiew ia ki thain ha ka liang ka roi ka par ha kiba bun ki liang.”

“Nga pynthikna ia ka jingkyrshan na ka bynta ban kyntiew ia ka Umiam Airport lem bad kiwei pat ki jingdonkam ha ka liang ki kam pynher liengsuin sha ka sorkar Meghalaya. Ngi la pyntreikam ia ki kyndon ki ban kham pynsuk ha kaba iadei bad ki kam pynher liengsuin na ka bynta ban kyntiew ia ka roi ka par jong ka ri hi baroh kawei,” u la ong.

U Myntri Rangbah ka Jylla u Conrad K Sangma ha ka jingkren u la ong ba kane ka jingpyrshang pynher ia kane ki Seaplane ba la khot pynlong da ka Tnad Transport ka Sorkar Meghalaya ha ryngkat ka jingiatreilang bad ka Tnad Civil Aviation ka Sorkar India.

Ha ka jingkren plie, u CM ka Jylla u la ong, “Ha kaba kut jong ki snem 90 haduh ki pdeng jong u snem 2000, kum u nongseng kam uba dang sdang nga la leit sha ki jaka bapher bapher jong ka thain Shatei Lammihngi jong ka Ri India kaba shim por haduh kumba 20 kynta da ka bus ban poi sha ki nongbah jong ki Jylla khamtam sha Kohima, Imphal bad kiwei pat ki jaka ban pyniaid ia ki kam ki jam ki jong nga. Nga la sngewthuh ia ka jingduna  halor ki jingduna ha ki lad pyniasoh bad ki jingeh kiba nga iakynduh ha katei ka por, bad haba ngi wan ha ka sorkar ha u snem 2018, ki liengsuin ki la kylla long ki bynta ba kongsan ban kyntiew bad wanrah ka jingkylla.”   

U la ong ruh, “Da ka jingsdang ia ka skhim UDAN ha u snem 2008 ka la wanrah shisha ka jingkylla kaba khraw ha ki lad pyniasoh ia ka ri India bad khamtam eh ia ka Jylla Meghalaya bad ka thain Shatei Lammihngi kumjuh.”

“U Myntri Rangbahduh ka ri u la buh ia ka kum ka mat ban pyniasoh ia ki headquarter jong ka thain sha kiwei pat ki jylla kiba kham rit bad ngi la sakhi ia kane ka jingkylla ka bym pat ju jia ha kine ki phra snem ba la dep. Mynta ngi lah ban leit ban wan tang hapoh khyndiat kynta sha kiwei pat ki nongbah jong ki jylla ka thain shatei lyngba ki liengsuin, bad la iohi ruh ia ka jingkyll kaba khraw bad ka jingkiew ha ki kam khaii pateng bad ki lad pyniasoh,” u la bynrap.

Haba kren halor ki jingeh kiba iakynduh u Conrad u la ong, “Ngi la mad ia shibun ki jingeh ha kaba iadei bad ka kad liengsuin Shillong Airport ha Umroi bad ngi dang shim ia ki sienjam ban pynheh ia ka lynti iaid liengsuin na ka bynta ki liengsuin kiba heh kum ki Airbus A320 ba kin kiew bad hiar. Ngi la lah ruh ban pynneh ia ka jingpyniasoh sha Delhi, hynrei ngi kwah ban pyniar ia kata ka network. Ngi don ruh ia ka jingangnud ban pyntreikam ia ka Baljek Airport ha Tura bad Nga thikna ba da ka jingkyrshan jong ka Tnad pyniaid liengsuin kane kan sa urlong shisha.”

Kine ki liengsuin ba la pyni paidbah kiba lah ban her ha suin bad ha ki jaka um ki dei kiba la shna da ka De Havilland Aircraft ka Canada Limited bad pyniaid da ka Spicejet.

Ha kane ka sngi la ia donlang ruh u Symbud Myntri Rangbah ka Jylla u Bah Sniawbhalang Dhar, u Bah Damanbait Lamare u MLA ka Umroi, u Chief Secretary ka Jylla u Bah DP Whlang, u Director ka Tnad Transport u Sanjay Goyal, ki nongmihkhmat na ka De Havilland Aircraft ka Canada Limited lem bad kiwei pat ki heh sorkar ka Jylla bad ka Sorkar Pdeng.