Pyllait u nongthoh khubor ba la rim ia ka kot “Surreal Symphony of Nature” halor ka Meghalaya

Syllad | The Rising MeghalayaAugust 13, 2024

U nongthoh khubor ba la rim bha u Subroto Bhattacharjee uba don ia ka jingiadei ha Meghalaya bad ka thain Shatei Lammhngi (Northeast) jong ka ri ha kine ki 45 snem kiba la leit noh u la pyllait paidbah ia ka kot jong u shaphang ka Meghalaya kaba kyrteng “Surreal Symphony of Nature” ia kaba lah ban ioh lyngba ka Amazon.

U Subroto u la pynlut ia ka por jinglong khynnah ha Assam bad Meghalaya bad u la long u nongthoh khubor ha ka thain Northeast mynta lah kumba 45 snem. Kum u briew uba sngewtynnad ha ka liang ka thoh ka tar, ka jingleit shangkai  bad ka jingiakynduh ia ki briew ka la pynlong ia u ban sngewthuh ba tang khyndiat eh ki bynta jong ka India ki tip shaphang kane ka bynta kaba jylliew jong ka  ka thain Northeast India.

Hadien ba u la shongthait noh kum u Chief of Bureau ka UNI( United News of India), u Subroto u la thoh khubor na ka bynta ka Doordarshan ha kaba iadei bad ki jaka jngohkai ha Meghalaya lem bad kiwei pat ki jaka ha ka thain Northeast.Kumta ruh lyngba kine ki jingthoh u la lah ban pynwan sha ka kot kaba u la lah ban pynmih paidbah.

Kane ka kot ka thmu ban pynpaw sha ka ri India shaphang ka Jylla Meghalaya bad ka thain Northeast hi baroh kawei ha ka rukom ka ban khring ia ki nongpule ba kin tip kham bniah ha kaba iadei bad kane ka thain bad ka ban wanrah ka jingsarong ia ka ri India hi baroh kawei.

Ki jingkdew ba kongsan jong kane ka kot ki kynthup:

Ka Festival of the 100 Drums.

Ka Durga Temple kaba la don da ki spah snem.

Ka jingiathuhkhana kaba ai mynsiem jong u riewstad ri uba la iaid da ki sngi kum u khynnah ban wad ia ka jingnang jingstad.

Ka longkmie kaba nyngkong eh na ka thain shatei lammihngi ban shakri kum ka Member of Parliament. Ka Entomological Museum na Meghalaya ba la pyni ha kawei ka kot ba pawnam ha ka pyrthei.

U Tirot Sing Syiem, u riewieid ri uba la pyrshah ia ka jingsynshar phareng jong ka phareng ha kaba sdang jong ka spah snem kaba khatkhyndai.

Ka shnong kaba jngai bad kaba itynnad bha kaba don ha kawei ka dewlynnong um.

Ki jinglong ba kyrpang jong ka Shillong Golf Course, kawei na ki madan Golf kaba rim tam ha ri India.

Ka Surreal Symphony of Nature ka ai ïa ka jingïohi kaba riewspah, kaba bun rukom ïa ka jylla Meghalaya bad ka thmu ban pynshlur ïa ki nongpule ban wad bad lap shuh shuh shaphang kane ka thaiñ kaba itynnad.