Pynbam ka Mawlai SC 6-1 kol pyrshah ia ka Nangkiew Irat ha ka lympung SPL

Syllad | The Rising MeghalayaMay 5, 2024

Ka lahduh jong ka samoi ialehkai ba la dep ka Mawlai SC ka la pynliem noh ia ka Nangkiew Irat SC haduh 6-1 kol ha ka lympung ialehkai Shillong Premier League kaba la long haka sngi Saitjain ha madan SSA First Ground, Polo.

Mar ia sdang ka jingialehkai ha ka kylla step, ka Nangkiew Irat ka la ioh ban pynkhih jar nyngkong lyngba u Felix Lalruatsanga ha ka minit kaba 7. Hynrei ka Mawlai ka la lah ban pynphai kylla ha ka minit kaba 29 lyngba ka penalty ba la shut da u Fullmoon Mukhim, bad ka la ioh ban thep biang ha ka minit kaba 36 lyngba u Romarus Laban.

Haba bteng ia ka jingialehkai ha ka kylla miet, ka Mawlai ka la lah ban banbor shuh shuh pyrshah ia ka Nangkiew Irat ha kaba ka la ioh ban khyrwit biang sa shi kol lyngba u Kevin Rymbai ha ka minit kaba 65, bad pynbud da u Donald Diengdoh ha ka minit kaba 68, u Pynbha Suting ha ka minit kaba 73 bad ia ka kol kaba khatduh eh la ioh ban thep da u bad u Mark G Shabong ha ka minit kaba 87.

Kane ka dei ruh ka jingialehkai kaba khatduh jong kane ka lympung kaba mynta ha kaba ka Mawlai ka la lah ban pynkut noh ia ka jingialehkai da kaba ioh ban khur 16 point, kata hadien jong ka Rangdajied United FC kaba la kamai 18 point.

Mynta ka Shillong Lajong FC bad ka Langsning ki la don ha ka kyrdan kaba lai bad ba saw da kaba ioh mar 15 point.

Ka jingialehkai ia ka semifinal kan sdang naduh ka taiew ka ban wan ha kaba ka jingiakhun kaba nyngkong kan long hapdeng ka Rangdajied pyrshah ia ka Lajong ha ka 7 tarik mynta u bnai, katba ka semifinal kaba ar kan long hapdeng ka Mawlai SC pyrshah ia ka Langsning ha ka 8 tarik mynta u bnai ha ka por 3:15 janmiet ha madan SSA Stadium.