Pynbeit thymmai ka Sorkar ia ka Investment Act ban pynthikna ban ym iaid lait ia ka LTA ha ki jingseng kam ha ka Jylla

Syllad | The Rising MeghalayaJanuary 15, 2025

Ka kynhun Myntri ka Sorkar Jylla ha ka 15 tarik Kyllalyngkot ka la mynjur ia ka kyndon thymmai jong ka Meghalaya State Investment Promotion and Facilitation Act, 2024, kaba thmu ban pynthikna ba kan ym don satia ka jingiaid lait ia ka Meghalaya Land Transfer Regulation Act, 1971 haba pynshlur ia ki jingseng ia ki kam ba kongsan ha ka Jylla.

“Ngi la weng noh ia ka para 34 da kaba bynrap ia kane ka lain ba kane ka Act kan ym iaid lait ia ka Meghalaya Land Transfer Regulation Act, 1971,” ong u Myntri Rangbah ka Jylla u Conrad K Sangma haba kren sha ki lad pathai khubor hadien ka jingialang.

Nalor kata u la pynbna ruh ia ka rai jong ka sorkar ban pynkylla kyrteng ia ka Investment Meghalaya Agency (IMA) kum ka Meghalaya Investment Promotion Authority (MIPA) lyngba kane ka jingpynkylla thymmai.

Ka jingthmu ka long ban ai da ka kyrteng kaba kham sngewtynnad ia kane ka agency namar ki tip ba ka Act da lade ka dei kaba la khot ka Meghalaya State Investment Promotion and Facilitation Ordinance, bad kumta haba iaid katkum ka Act hi ngi khot ia kane ka bor treikam mynta kum ka MIPA ha ka jaka jong ka IMA,” bynrap u Myntri Rangbah.

U la ong ruh ba ia kane ka jingshim rai la shim hadien ka jingialang ba dang shen bad ka kynhun na ka KHADC ba la ialam da u Chief Executive Member (CEM) u Bah pyniaid Sing Syiem kiba la pynpaw katto ka jingsngewkhia halor kane ka bynta.

U la pyntip ruh ba ka sorkar ka la rai ban pynrung ia ki jingai jingmut ba la ai da ka KHADC kaba kynthup ia ka jingpynkylla ia ka para 34 jong ka Act.

“Nga kwah ban pynshai ba kane ka clause Article 34  ka long beit thik halor ka common application forms.Ha ki snem kiba la dep, ka Single Window Agency (SWA) ka donkam ia ki katto katne ki aplikeshon ia kiba hap ban phah sha ki lyngba ki katto katne ki form, ka MUDA ka donkam ia ki aplikeshon ha l ki jong ki form, ka MTDC ruh ka donkam ia ki aplikeshon ha la ki jong ki form, kumta khnang ban kiar ia ka jingpynkylla ia baroh ki 6-7 Act bad ban pynrung ia ki kyndon jong kane ka Act, ngi la wanrah ia kane ka kyndon hapoh ka Act ka ban pyniap noh ia ki kyndon jong kito kiba rim.Nga shu kwah ban pynshai hynrei namar ba ka la wanrah ia ka jingklumar jingmut ha ki District Council bad kiwei pat ki para dkhot kumjuh na ka liang ki riew paidbah, ka sorkar ka la rai ban pyndam noh ia ka Article lane ka para 34 jong kane ka Act kaba la pynmih ia kane ka jingklumar jingmut,” ong u Myntri Rangbah.

Da kaba pynpaw ba ia kane ka Act la mynjur khnang ban pynsuk ia ka jingwan seng ia ki kam ba kongsan ha Meghalaya, u Myntri Rangbah u la ong, “Nga la pynshai ha ki por kiba la dep ba ha ki snem kiba la leit noh ka don ka Single Window Agency kaba khmih ia ki project sengkam bad bei tyngka bapher bapher ha ka jylla, hynrei namar ka jingnang iar jong ki kam, kata kaba kynthup mynta ia ka tnad ka koit ka khiah, ka kam rep, ka kam jngohkai pyrthei, IT sector, ka kam pynmih bording bad ki kam karkhana, kumta ruh kane ka kam ka la nangkham iar bad kumta ngi donkam ia ka bor kaba kham iar ban khmih halor kane ka phang, bad dei kane kaba lam sha ka jingmih jong ka Investment Meghalaya Agency (IMA) ha katei ka por.Kumta ruh la mynjur ia kane ka Act.

Nalor kata u la bteng da kaba ong, “Mynta ngin sa pynkylla ruh ia kiwei ki kyndon kiba don hapoh ka SWA, ka Promotion Policy lane ka Tourism Act lane kiwei pat ki Act kiba shah ktah ha kane.Ngin sa wanrah ia ki jingpynkylla kiba donkam bad ban weng noh ia ka para 34 khnang ban kiar na ki jingklumar jingmut hapdeng ki paidbah, bad u la ong ba kawei ka jingshisha ka long ba kane ka Act da lei lei ruh kan ym iaid lait ia ka Meghalaya Land Transfer Regulation Act, 1971.”

Ha kaba iadei bad ka jingsngewkhia ia ka para 13 jong ka Act, u Conrad u la ong, “Ka don ka paragraph kaba kdew ba lada ia ki form bad jingsiew ia kiba dei ban hap pyniaid bad ioh jingmut ha kino kino ki ain ka sorkar pdeng, ia ki aplikeshon dei ban phah sha ka sorkar pdeng.Kumta khnang ban pynthikna ba ngi shimkhia halor ki jingsngewkhia jong ka KHADC bad kiwei kiwei ki dkhot, ngi la pynrung sa kawei ka paragraph kaba ong ba lada don ki form ne jingsiew kiba hap ban ioh jingbit na ki ADC, ia kine ki aplikeshon dei ban phah lyngba kine ki from ha ryngkat bad ki jingsiew.”

“Ia ki jingbit na ki District Council dei ban aplai na ki District Council hi.Namar ka mih ka jingklumar jingmut halor kane, ngi la wanrah ia kane ka paragraph ka ban pynshai ba ia ki aplikeshon, ki jingbit, baroh ki NOC bad kiwei pat kiba donkam na ki ADC dei ban iaid lyngba ki ADC,” u la bynrap.