Pynbiang lad jingiarap iaki lanot shlei um ong ka KSU ia u DC East Jaintia Hills

Syllad | The Rising MeghalayaMay 29, 2020

U Deputy Commissioner ka East Jaintia Hills District u Bah FM Dopth ula kular ban shimkhia ban pynbiang lad jingiarap iaki lanot shah lyngshop eriong bad slap ha ki shnong bapher bapher hapoh East Jaintia Hills District.

Ha kine ki khyndiat sngi u slap bad ka lyer kala wan lyngshop haka East bad West Jaintia Hills ha kaba ka eriong ryngkat bad u slap kila pynjulor hadien ka jingjia shlei um bad twa khyndew ha kiba bun ki jaka.

Ka KSU kala ai da ka dorkat ha u DC ban kyrpad ia u ban ai jingiarap ba shipor iaki nongshong shnong ka Umkyrpong, kaba don haka shnong Samasi kaba la shah ktah haka jingshlei um bad ki nongshong shnong kila hap ban sah ha ka shnong ba marjan ka Mooriap.

Ka KSU Khliehriat Circle hapoh ka jingialam u SS. Niangti President KSU Khliehriat Circle ban pynsngew ha kaba iadei bad ka jingshah ktah ki longiing longsem hadien ka jingther jong u lapbah ha kine ki khyndiat sngi ha u DC mynta ka sngi.

La iadonlang u SS Ryngkhlem President jong ka Synjuk Ki Waheh Shnong hapoh ka thain East Jaintia Hills, u President ka KSU NEHU Unit  bad General Secretary jong ka KSU Khliehriat Circle u Cherity D. Suja bad ki katto katne ki dkhot jong ka KSU.

Ka KSU kala ong b aka jingiakynduh kalong kaba kaba seisoh ha kaba na ka liang u DC ula kular ban khmih ia kine ki longiing da kaba pynbiang bad ai ki lad jingiarap khamtam ki marbam mardih bad ruh ban khmih kyrpang ia kito ki longiing haki shnong kiba la kham shah ktah jur.

Ka KSU Khliehriat Circle ka la shim ka kabu ban kyrpad iaka sorkar bad ki bor ba dei peit ban pynioh iaki lad jingiarap mar mar, khnang ba ki lanot kin ioh ka jingiarap haka por kaba biang.