Pynbna biang ka HSPDP iaki 3 ngut ki kyrtong MDC kynthup ia ka hynmen u Myntri Sorkar

Syllad | The Rising MeghalayaJanuary 9, 2025

Ka Hill State People’s Democratic Party (HSPDP) ha ka 8 tarik Kyllalyngkot ka la pynbna biang sa laingut ki kyrtong ki ban iakhun ia ka elekshon MDC ka ban wan sha ka Khasi Hills Autonomous District Council (KHADC).

Kine ki laingut ki kyrtong ki kynthup ia ka Kong Phinda Warjri kaba dei ka hynmen jong u Myntri Sorkar u Bah Shakliar Warjri ka ban ia aireng na Pariong constituency, u nongthoh khubor u Bah Starfing Pdahkasiej u ban iakhun na  Mawsynram bad u Bah Srally Rashir na  Mawshynrut. 

Haduh mynta ka HSPDP ka la dep ban pynbna ia ki kyrteng jong ki khatwei ngut ki kyrtong ha kaba arngut na ki, ki dei ki ban iakhun sha ka Jaintia Hills Autonomous District Council (JHADC).

Haba kren sha ki lad pathai khubor, u president ka HSPDP u Bah KP Pangniang uba la pynbna ia ki kyrteng jong kine ki kyrtong u la ong ba ki don katto katne tylli ki constituency kiba ka party ka la shim ia ka rai ba kan ym pynieng kyrtong hadien ka jingiasngewthuh jingmut lang bad ka United Democratic Party (UDP) kiba iatreilang hapoh ka Regional Democratic Allaince (RDA).

U la ong ba na ka liang ka UDP ruh kan leh kumjuh ha ki katto katne ki constituency ha kaba kam shym la pynieng ia kino kino ki kyrtong.

U Bah Pangniang u la ong ruh ba ka thong ba kongsan jong ka party ha kane ka elekshon sha ki ADC ka dei hi ban iada ia ka jinglong kyrpang ha ka synshar khadar tynrai kaba hiar pateng naduh ki longshuwa manshuwa, ban iada ia ka khyndew ka shyiap, ban pynkhlain shuh shuh ia ka bor jong ka District Council hapneh jong ka Sixth Schedule bad kiwei kiwei.

“Naduh ba la seng ia ka ha u snem 1968, ka HSPDP ka la ieng iakhun borbah lyngba ka KHADC na ka bynta ban iada ia ka khyndew ka shyiap khamtam ha ki jaka kiba don ha ka jingiakajia pud bad ka Assam.Ngin bteng ruh ban iakhun bad ban dawa na ka sorkar jylla ban pyndep noh ha kaba iadei bad ka kam ia pynbeit pud bad ka Assam,” bynrap u Bah Pangniang.