Pynbna containment ha ki ar shnong ha Mairang Sub Division

Syllad | The Rising MeghalayaMay 11, 2021

U Sub-Divisional Magistrate, Mairang Civil Sub-Division, Mairang ula pynbna containment area iaki artylli ki shnong kaba kynthup iaka Shnong Mairang Mission bad ka Shnong Umthied Bynther hadien bala kiew ka jingiabit khlam ha kine ki shnong haka sngi ba Ar.

Katkum ka hukum kaba la pynbna, ym shah iano iano ruh ban rung ha kitei ki Containment Area lait noh ki nongtrei jong ka tnat ka koit ka khiah bad kito kiba la ioh jingbit na ki Incident Commander ba dei peit ia kine ki shnong. Baroh ki nongshong shnong ki dei ban shong khop ha la iing, ki dei ruh ban deng mask thikna, kim dei ban iakhleh bad kiwei pat bad ki dei ban sngapthuh bha lada ki don kano kano ka jingsngew shitmet ne jyrhoh ne dap shadem bad jynjar ban ring ne pynhiar mynsiem.

Shuh shuh, baroh ki dukan kiba don ha kitei ki ar shnong kin khang lut bad ki ophis ruh kin khang lut lait noh ka Mairang Police Station, Mairang.

Kino kino kiba pynkhein ia kitei ki hukum kin shah pynshitom katkum ki kyndon ain jong ka Disaster Management Act, 2005 bad ka IPC.

Haduh bala pynmih iaka hukum ki don haduh 9 ngut kiba ioh ia u khniang jingpang COVID-19 ha Mairang Mission bad 12 ngut ha Umthied Bynther.