Pynbna iakhih ka JHTOA pyrshah iaki karkhana hadien ba kila thied trok hi ban kit dewbilat

Syllad | The Rising MeghalayaOctober 13, 2021

Ka Jaintia Hills Truck Owners Association (JHTOA) kala pynbna iakhih paidbah sa shisien hadien ba ki karkhana kiba pynmih dewbilat ha rilum Jaintia kim shym la pyntreikam ïaki jingpynbeit ka JAC kaba kynthup Jaintia Hills Truck Owners Driver Association (JHTOA), Meghalaya Truckers Union (MTU) bad ka All Jaintia Hills Clinkers and Cement Association (AJHCCA) halor ka bai kit bai bah cement bad ka jingpynkynriah iaka godown ne ka jaka buh cement na Byrnihat sha Guwahati Assam.

Ka JHTOA haka jingialang kaba long haka sngi Balang ha Phramer da kawei ka sur kala rai ban iakhih paidbah da kaba pynlong iaka strike pyrshah iaki karkhana dewbilat naduh ka 20 tarik Risaw (October) lada ki karkhana dewbilat kim pyntreikam ia kaei kaba la iakren pynbeit hapdeng ka sorkar bad ki karkhana kumjuh bad ka JAC.

U Publicity secretary JHTOA u Nehemayah Tyngkan hadien ka jingialang haba kren bad ki nongthoh khubor ula ong “Ka JHTOA kala rai ban pynlong da ka strike naduh 20 tarik Risaw lada ki karkhana dewbilat kim pynneh iaki godown ha Byrnihat bad pyntreikam iaka dor bai kit bai bah kaba la pynbeit haka dor T.7 shi kilo meter.”

Ula ong ba ka Star Cement ha ka jaka ban pyntreikam ia kaei kaba la iakren pynbeit ka sorkar Jylla, mynta kala thied hi iala ki jong ki kali haduh 300 tylli ban pyniaid hi ia kine ki kali ban kit dewbilat na ki karkhana na East Jaintia Hills bad ban kit sha kiwei ki jylla.

“Kane ka jingleh kine ki karkhana kala pynduh kamai kajih iaki trai trok trai jylla bad ka JHTOA kala shim iaka rai ba  kine ki karkhana kidei sangeh ban thied kali khnang ba kan nym ktah iaka kamai kajih ki trai trok trai jylla,” la ong u Nehemayah. Ula ong ruh hadien bala iakren pynbeit bad ki nongialam ka MTU bad ka AJHCCA la rai ban pyndam noh iaka JAC bad ka JHTOA kan ialam hi noh ban iakren bad kino kino ki jingeh jong ki trok ha Jylla.

U Nidamon Chullet president JHTOA ula ong “Kine ki karkhana dewbilat kila khein dewthala ia kaei kaba la iakren pynbeit bad kim burom wat iaka sorkar, kumta kim banse ban shim iaka rai ba tyngeh bad khang syndon ia kine ki karkhana naduh ka 20 tarik Risaw lada kim pyntreikam ia ka bai kit bai bah thymmai kumjuh ban pynneh iaki jaka buh cement ha Jylla.”

“Mynta kine ki karkhana dewbilat naduh ka Star Cement kala thied 300 tylli ki trok 16 shaka, ka Dalmia bad Topcem mar 150 tylli bad kane ka jingleh kine ki karkhana kila knieh syndon iaka jakpoh jong ngi bad bun ki trai trok kim ioh shuh ban siew iaka ram sha ki bank namar ka jingduh kamai,” la ong u Nidamon.

“Da kawei ka sur ngi rai ban khangtala ïa kine ki karkhana bad ngin ai por ba kin pyntreikam ia kaei kaba la pynbeit hapoh 20 tarik u Risaw,” ong u Nidamon bad dawa ba baroh ki karkhana ki dei ban sangeh mardor ban thied trok khnang ban kan nym ktah iaki trok trai jylla.

Shuh shuh ka JHTOA kala rai ban ai jingthoh sha u myntri ka tnad Transport, DC Ribhoi ban shna iaka Uturn ha Jorabad khnang ba ki trok kit mar ka jylla kim hap ban rung sha Assam haba pynhap mar.