Pynbna ka Congress iaki 26 ngut ki kyrtong sha ka elekshon MDC na KHADC bad JHADC

Syllad | The Rising MeghalayaDecember 19, 2024

Ka liang pyrshah Congress haka 19 tarik Nohprah ka la pynbna ia ka thup kyrteng ba nyngkong jong ki 26 ngut ki kyrtong sha ka elekshon MDC ban wan sha ki ar tylli ki autonomous district council (ADC) ha Khasi bad Jaintia Hills, kaba la thmu ban long ha ka 21 tarik February.

Ka seng Congress kala pyntip ba napdeng kine ki 26 ngut ki kyrtong, 15 ngut ki kyrtong na Khasi Hills bad 11 ngut na Jaintia Hills, hadien ka jingjied kaba pyrkhing bha ha kaba la don lang ki Block Congress Committee (BCC), ki District Congress Committee (DSC), bad ka Pradesh Election Committee (PEC).

“Ki kyrtong ba la jied ki kynthup lang iaki dur khmat kiba thymmai, ki riew shemphang kiba la tbit, bad ki briew shimet kiba la shah hikai ban shakri hok ha ki kam jong ki. Kane ka pynpaw ïa ka jingangnud jong ka Congress ban wanrah ïa ki nongïalam kiba tbit bad kiba shlur, kiba aiti lut na ka bynta ka bha ka miat bad ki jingangnud jong ki paidbah ka Meghalaya,” ong ka seng haba bynrap “Katba ngi nang jan sha ka elekshon, ngi kyrpad ïa ki nongthep vote jong ka Ri Khasi bad Jaintia Hills ban buh ia ka jingshaniah ha ka Congress bad ha ki kyrtong jong ngi. Ka Congress kan ïai bteng ban ïada iaka Sixth Schedule bad ban pynneh ïa ka hok bad jingmyntoi jong ki jaidbynriew riewlum.”

“Ngi ngeit ba ki paidbah ka Meghalaya kin ai ka rai kaba skhem sha ka Congress ba kan lah ban bteng ïa ka thong ban kiew shaphrang, ban roi, bad ban ai hok ïa baroh. Ryngkat, to ngin pynkhlaiñ ïa ka synshar paidbah bad trei na ka bynta ka lawei kaba phyrnai jong ka Jylla Meghalaya,” ka la bynrap.

Ki 15 ngut ki kyrtong na ka byna ka elekshon sha ka KHADC ki kynthup ia u Bah Dominic Mynsong na Mawhati, Rocky A Marwein-Umsning, Jonathan Syiem-Sohryngkham, Hilarius Warbah-Mawkynrew, Astarland Khyllep-Shella, Banphiralang Basaiawmoit-Mylliem, Allan Victor Lyngdoh-Nongthymmai, Manuel Badwar-Laitumkhrah-Malki, Pynshngainlang Syiem- Mawkhar- Pynthorumkhrah, Gerald Shullai-Jaiaw-Mawprem, Wanseng Jyrwa-Mawlai, Nathaniel Rymmai- Nongspung-Sohiong, Lawanpynshngain War-Mairang-Nongkhlaw, Bormanding Nonglang-Rambrai Jyrngam bad u Medal Sing Lyngdoh na Mawkyrwat.

Katba ki 11 ngut ki kyrtong na ka bynta ka JHADC ki long u Romeo Lyngdoh na War Central, Madonbai Rymbai-Amwi-Khliehtyrchi, Jona Rynjah-Moodymmai-Nongkhroh, Pyrkhatbha Pyrphet-Mynsngat-Khanduli, Banikas Laban-Barato-Mukroh, Rikut Parien-Saphai-Sahsniang, Welpard Suchiang-Raliang, J Treilang Suchiang-Shangpung, Yooniki Phawa-Muthlong Sohkynphor, Siril Suja-Sutnga Nongkhlieh bad u Grimlang Dkhar na Narpuh.