Pynbna ka ECI ban pynlong ia ka Bye Election ha Gambegre ha ka 13 tarik Naiwieng; la treikam mardor ka MCC

Syllad | The Rising MeghalayaOctober 15, 2024

Ka Election Commission of India (ECI) ha ka 15 tarik Risaw ka la pynbna ba ia ka elekshon shiteng samoi ne bye election na ka bynta ka Gambegre Assembly constituency, West Garo Hills District yn pynlong ha ka 13 tarik u Naiwieng 2024.

Ia kane ka ECI ka la pynbna ha ka jingialang bad ki lad pathai khubor ha ka 15 tarik u Risaw ha Vigyan Bhawan, New Delhi

Ia kane ka elekshon shiteng samoi ha Gambegre la pynlong hadien ka jingiehnoh kam jong u MLA ka Congress u Saleng A Sangma hadien ba u la shah jied kum u MP ka Tura ha kaba sdang jong une u snem.

U Chief Electoral Officer (CEO) ka Jylla u BD Tiwari ula ong ba na ka liang ki bor sorkar kila pynkhreh lut nadong shadong ban pynlong ia kane ka elekshon kaba khuid bad suba bad kaba iaid beit iaid ryntih.

U pyntip ba ka tarik ba khatduh ban thep kyrteng kan long ha ka 25 tarik Risaw katba ka jingbishar bniah ia ki kot ki sla kan long ha ka 28 tarik Risaw. Ka tarik ba khatduh ban weng kyrteng kan long ha ka 30 u Risaw katba ka jingpynbna ia ka reslut kan long ha ka 23 tarik u Naiwieng 2024.

Une u heh ka Tnad pyniaid elekshon u pyntip ruh ba ka ka Election Commission mynta ka la pyntreikam pura ia ka Model Code of Conduct ha West Garo Hills namar kane ka elekshon shiteng samoi ha Gambegre, bad kane kan treikam ia baroh ki kyrtong, ki seng sain pyrthei bad ka sorkar Jylla.

Ka party synshar National People’s Party (NPP) ka la pyniakhun da ka kurim u Myntri Rangbah Conrad K Sangma ka Mehtab Chandee Sangma katba ka TMC ka la pynieng da ka MDC kynthei ba marwei ka GHADC na Dengnakpara Sadhiarani M Sangma kaba dei ruh ka kurim jong u MLA barim u Zenith M Sangma.

Katba ka liang pyrshah Congress bad ka Bharatiya Janata Party (BJP) kim pat shym la pynbna ia ki kyrtong jong ki.

Ka Gambegre ka don baroh haduh 32,254 ki nongthep vote kaba kynthup ia 16,331 ki shynrang bad 15,923 ki kynthei, laingut ki service voters, 64 kiba la tymmen, 100 ngut kiba don jingduna ha ki dkhot met.

Napdeng ki 51 tylli ki Polling Station, 31 tylli la ithuh kum kiba don jingma.

Ha ka 14 tarik u Risaw ka nongialam ka NPP kaba dei ruh ka Myntri Sorkar ka Kong Ampareen Lyngdoh ka la ong ba ka party ka la long kaba la pynkhreh pura na ka bynta kane ka elekshon shiteng samoi, bad ka la pynpaw ruh ia ka jingsngew skhem ba ka NPP kan iakhun tyngeh ban jop ia kane ka seat.