Pynbna ka Hima Khyriem haka 1-2 tarik Naiwieng ka Shad Nongkrem, ki Youtuber kin hap ioh jingbit ban pyllait paidbah iaka jinglehniam

Syllad | The Rising MeghalayaOctober 29, 2023

Ka Hima Khyriem haka 28 tarik Risaw kala pynbna ban pynlong ia ka jinglehniam bad ka Shad Nongkrem ha ka 1 bad 2 tarik Naiwieng 2023.

Ia kane la pynbna da u Syiem ka Hima Khyriem u Paiem Dr. Balajied Sing Syiem uba la iathuh ruh ba ka Hima ka la iaid shaid shaid ia ki jingdonkam ban pynthikna ba kane ka jinglehniam bad ka Shad Nongkrem kan long kaba seisoh.

U Paiem ula ong ba ia kane ka lehniam bad ka Shad Nongkrem la sdang naduh ki por mynbarim, kata naduh ba dang don tang ka Hima Shyllong tad haduh 1853 ba la mih ka jingiapyllait noh hapdeng ka Hima Khyriem bad Hima Mylliem.

Ia kane ka jinglehniam la sdang naduh ki por ba ka ïingsad ka dang don ha Nongkseh bad ka jinglehniam Hima Khyriem mynta u snem kala long kaba pynkhreh ban pynlong ia ka jinglehniam bad Shad Nongkrem kumba la leh man u snem ha ha Madan ïingsad kaba don ha ïing Syiem Smit, la ong u Paiem Balajied.

Haba batai halor ka jinglehniam, u Paiem ula iathuh ba ha ka 1 tarik Naiwieng kan don shwa ka jinglehniam bad ka Shad Shynrang ha Lum Pomblang Iewduh bad ha ka 2 tarik jong ka sngi kut kan don ka jingiashim bynta jong baroh ki khun Khasi ka Bri U Hynniewtrep hashuwa ka Pomblang.

Haba kaba iadei bad ka jingpynkhreh ia ka lehniam bad Shad Pomblang, u Paiem ula iathuh ruh ba ka Sorkar Jylla lyngba ka tnad Tourism kala theh pisa haduh T. 2 klur 68 lak ban shna pynbha ia ka jaka shong ki paidbah ban sakhi ia ka lehniam ha Lum Pomblang Iewduh.

Shuh shuh u la ong ba ka Hima kam peit khmat iano iano hynrei ka pdiang lut ia baroh ki khun ka Bri U Hynniewtrep ban wan shim bynta ha ka jingshad Nongkrem namar kane kadei ka kawei ki bynta

Ka Hima Khyriem kala kyntu ruh iaki Youtuber lada dei ki kynhun ne riew shimet ba shuwa ban pynmih pyrthei iaki jinglehniam kin hap ban iasngewthuh jingmut shuwa bad ka dorbar khnang ba nym ialam bakla sha ka pyrthei iaka rukom pyndep niam.