Pynbna ka JHADC ba ka shnong Thadmynri ka hap ha Elaka Nartiang

Syllad | The Rising MeghalayaOctober 17, 2020

Ka Jaintia Hills Autonomous District Council (JHADC) kala pynbna ba ka shnong Thadmynri, ka hap ha Elaka Nartiang.

Ka Kong R Phawa, Secretary JHADC haka jingpynbna bala pynmih haka 7 tarik Risaw (October) 2020, ka shithi NO.JHADC/POL/33/2014/20 ka ong ba ka ka Executive Committee Jaintia Hills Autonomous District council Jowai hadien ba la bishar bniah ia ki kot ki sla ki ba iadei bad u pud u sam jong ka shnong Thadmynri la shem ba ka shnong Thadmynri ka hap hapoh u pud sam jong ka Elaka Nartiang.

“Ka Executive Committee Jaintia Hills Autonomous District Council Jowai ka la rai ba naduh ba pynmih ia kane ka jingpynbna ka Shnong Thadmynri kan hap hapoh ka jingpeit jong u Dolloi ka Elaka Nartiang,” la ong ka Secretary JHADC haka jingpynbna.

Kane ka jingpynbna kala pynlyngngoh iaki paidbah jong ka Elaka Nongjngi kaba baroh shikatta kane ka shnong Thadmynri ka hap hapoh Elaka Nongjngi.

Ka khubor kaba iohlum u Dalloi Elaka Nongjngi un khot jingialang jong ki Raij bad ki Waheh Shnong ka Elaka ban iakren halor kane jingpynbna ka konsil.