Pynbna ka MCA ban seng ia ka Cricket Academy ha EJH & jaka kilan kyrpang ha Jowai

Syllad | The Rising MeghalayaFebruary 24, 2025

Ka Meghalaya Cricket Association (MCA) ka la pynbna ban kan seng iaka Cricket Academy ha East Jaiñtia Hills bad ka madan ai jinghikai ba kyrpang ne jaka kilan (training pitch) ha Jowai, West Jaiñtia Hills ka ba long ka sienjam kaba kongsan ban kyntiew ïa ka ialehkai kriket ki samla Rilum Jaintia.

Kane ka jingthmu dei kaba lamkhmat da ka East Jaiñtia District Cricket Association (EJDCA) bad ka West Jaiñtia Hills District Cricket Association (WJHDCA) na ka bynta ban pynbiang ïa ki jaka hikai kiba ïadei bad ka juk mynta iaki samla ïalehkai kriket.

Haba kren ha ka jingïalang ba nyngkong eh jong ka Apex Council ha Jowai ha ka 18 tarik u Rymphang, u President ka MCA u Naba Bhattacharjee u la ong ba ka jingangnud jong ka MCA ka long ban kyntiew iaka sap ka phong ialehkai cricket naduh na tynrai. U la pynpaw, “Kumba baroh phi ia tip ha ka Kriket ne kiwei pat ki jingialehkai sport, ym don ka samoi kaba lait, shisien ba kawei ka samoi ka la kut, ka jingpynkhreh na ka bynta kawei pat ka la sdang mardor. Ngi kut jingmut skhem ban kyntiew ia ki sap ki phong jong ki riew don sap bad kine ki jingtei kiba thymmai kin pynioh ia ki lad jinghikai kiba paka na ka bynta ki samla ialehkai kriket jong ngi.”

Ka MCA ka dang bteng ban pynleit jingmut ban pyniar ia ki lad ha ka jingialehkai kriket sha baroh ki bynta jong ka jylla Meghalaya, da ki jingyrshang kiba khraw ban kyntiew ia ki jingtei bad ka jingkiew jong ki nongialehkai ha ka thain. Ka Association ka dang pynleit jingmut ruh ban kyntiew ha kaba iadei bad ki madan ialehkai ha Nongstoin, Mendipathar bad  Mukhla ha West Jaintia Hills, ha kaba ka Mukhla ka la kylla long ka jaka ialehkai kriket kaba kongsan ha kine ki ar bad lai snem ki ban wan. Lyngba ka jingkyrshan da u MLA ka thain u Bah Wailadmiki Shylla bad ka West Jaintia District Cricket Association, kane ka project ka thmu ban pynbiang ia ki jaka ialehkai kiba biang pura.

Ka Apex Council ka la pynskhem ruh ia ki nongkitkam jong ka hadien ka elekshon shiteng samoi kaba la pynlong katkum ka kyndon 15 jong ka riti synshar ka MCA naka jingiehnoh kam u honorary secretary. U Bah Rayonold Kharkamni uba dei u Vice-President u la shah jied kum u Honorary Secretary, katba u Sengnab Momin u la shah jied kum u Vice-President bad u Gideon Kharkongor kum u Member Councillor. Kane ka jingjied nongkitkam kala long 13 tarik Rymphang.

U President ka MCA u Bhattacharjee u la ban jur ïa ka jingdonkam jong ki prokram ai jinghikai bad don iaki coach ba la pyntbit ha ki district. “Ym lah ban shu jied iano iano kum u coach. Ki hap ban sdang na ka kyrdan O, nangta kiew sha ka kyrdan A, bad khatduh sha ka kyrdan B. Ngi kwah ba man la ka distrik kan don la ki jong ki nonghikai ba la pyntbit namar ka jingialehkai kriket ka dei ka jingialehkai kaba khampher ne technical games bad ka long kongsan bha ban ioh iaka jinghihkai naduh grassroot level ne tynrai,” u la ong bad bynrap ba ka MCA ka la ai jingkyrshan pisa ruh sha ki distrik association na ka bynta ki prokram ai jinghikai bad ai jinghikai.

Ka MCA ka iai bteng ruh ban kyntiew ha kaba iadei bad ki madan ialehkai Cricket ha kylleng ka jylla Meghalaya ha kaba ka la lah ban pynioh ia ka madan thymmai ha Mawkyrwat bad Nongstoin, ha kaba ka Nongkhrah ka la kylla long kum ka jaka ba kongsan na ka bynta ka jingialehkai kriket hapdeng ki khynnah rit hadien ba ka la pynlong ia ka North East tournament. Kumjuh ka jingshna ia ka jaka aijinghikai ha madan Kurkalang, Ri Bhoi ruh ka la jan dep bad kaba la plielad na ka bynta ki kam aijinghikai baroh shi snem wat hapdeng jong ka por slap. Ia kane ka sienjam la tyrwa da u Bhattacharjee ha u snem 2017 shibynta jong ka NADP ka BCCI bad ia kaba mynta la pyntreikam ha baroh ki hynriew tylli ki jylla ka thain shatei lammihngi.

Ka MCA ka dang pyrshang ban it bad iakren ha kaba iadei bad ki madan ialehkai ha Mendipathar, bad ha South Garo Hills. Ka Alotgre la ithuh kum ka jaka ïalehkai ba pura jong ka BCCI na ka bynta ki jingïalehkai hapoh ka ri bad ka la dep ban pynlong ïa ka jingïalehkai jong ka CK Nayudu, ha kaba kiwei pat ki jingïalehkai ki dang don ha ka samoi ban wan. Hynrei ki jingeh ki dang sah ha East Garo Hills, ha kaba ïa ka madan kriket la shimti noh da ka Khelo India.

U Bhattacharjee u la pynskhem biang ïa ka jingthmu jong ka MCA ban pynlong ïa ka kriket kaba lah ban ïoh ha kylleng ka Meghalaya, da kaba ong, “Ka Cricket kam dei ban sah kum ka jingïalehkai jong ki katto katne kiba don ba em. Ngi kwah ban plie lad ia baroh ha kylleng ka jylla namar ngim tip nangno u Dhoni ne ka Harmanpreet kiba hadien kin mih.”

Ha kane ka jingialang jong ka Apex Council la wan ban iashim bynta da ki nongialam ka MCA bad ki nongkitkam na ki district.