Pynbna ka Meghalaya Cricket iaki kyrteng ki 8 ngut ki nongialehkai ia ka Jylla haka Ranji Trophy

Syllad | The Rising MeghalayaOctober 22, 2024

Ka Committee kaba la thung da ka synjuk ka Meghalaya Cricket Association (MCA) kaban khmih bad ban jurip bniah ia ka kam kaba iadei bad ka jinghap ban khot ne shim ia ki rang ialehkai na shabar jong ka jylla ban mihkhmat ha kane ka samoi ialehkai kaba mynta jong ka BCCI ka la wan shakhmat ba kan shim ia ki kato katne ki rai ha kaba ka la dep ba kan aiti ruh ia la ka kaiphod ka jong ka sha u Hony Secretary ka MCA.

Kat kum ka kaiphod la ioh jingtip ba kane ka committee ka la ai jingmut ba kan shah ne ailad ia ki phra ngut ki rang ialehkai ban lah ban mihkhmat ia ka Meghalaya.

Dang ha u bnai uba la dep, ka la don ka jingujor pyrshah ha kaba iadei bad ka jingiohlad ki kato katne ki rang ialehkai ha ka kyrdan jong ka Senior Men’s U-23, kaba pynlong mar mar ia ka MCA ba kan shim ia ka sien jam da kaba thung ia ka committee jong ki lai ngut ki dkhot kaba kynthup ia vice-president Rayonald Kharkamni bad sa arngut ki dkhot ka Apex Council katta u bah Arwotki Sumer bad u Sengnab Momin ba kin khmih bniah halor jong kane.

Hadien ba la iaid lyngba ia ki kot ki sla kiba donkam naduh birth certificates, Aadhaar card, voter identification, kane ka committee ka la sngewdei ba kan shah bad plie lad ia ki 8 ngut ki rang ialehkai kiba nabar katta kum u Jaskirat Singh Sachdeva, Arpit Bhatewara (Senior Men’s team), Rohit Kumar Yadav, Raghav Kumar Magotra, PM Santosh, Kevin Sanjeev Christopher, Abhishek Kumar bad Sachin Kumar (U-23 Men’s team) ba ki lah ban mihkhmat ia ka Meghalaya ha kane ka samoi ialehkai kaba mynta.

Katba arngut ki player ba kynthup ia u Sachin Kumar bad Rohit Kumar Yadav, ki al ioh shwa ban pdiang tang ia ka provisional clearance da kane ka committee bad ba ki donkam ban aiti ia ki school certificate bad residential certificate shwa ban shah ne ailad ia ki ban mihkhmat ia ka jylla.

Shuh shuh kane ka committee ka la shim ruh ia ka rai ba u Banialam Mylliemngap u bym shym la lah ban pynrung ha ka thup ka kynhun ialehkai jong ka 23 Men’s team lehse yn lah ban pdiang ne mynjur ia ka jingjied biang pat ia u kaban shong ha ka jinglah ka jong u ban koit noh na ka jingshitom bad ban da ioh ia ka fitness clearance na ka kynhun jong ki physiotherapist.

Sa kawei pat ka jingai jingmut jong kane ka committee ka long ba nangne shakhmat ka MCA ka dei ba kan kyntu ia baroh ki synjuk ialehkai kriket ba don ha kane ka jylla ba kin da pyntikna ia ki kot ki sla kiba donkam jong ki player ha shawa ba kin aiti pat sha ka MCA, kaba long kat kum ka kyndon ba la pruid dak da ka BCCI.

Ka jingai jingmut ba khatduh na kane ka committee ka long ba ka MCA ka donkam ba kan thung ia uwei u nongjied player (selector) naka na ka kynhun jong ka Senior Men Selection Committee kaba donkam ba un da don beit da la ka met ha ki por ba ka  kynhun ialehkai ka jylla ka iakhun ha la iing ne  shabar na la iing, khnang ba un ioh ia ka lad ba un khmih bad jurip bniah ia ka jinglong ka jingman bad ka rukom ialehkai ki player ha ki jingiakhun kiba dang sah jong ka Ranji Trophy 2024-25.

Hadien ba la ioh ia ka jingai jingmut na kane ka committee, Senior Men Selection Committee ka MCA ka la lah pat mynta ba kan pynrung ia ka kyrteng ka jong u Arpit Bhatewara sha ka thup ialehkai kaba 15 ngut jong ka jylla kaban dang bteng ban iakhun ia ki jingialehkai kiba dang sah ka Ranji Trophy 2024-25, katba ka kyrteng u Jaskirat Singh Sachdeva la dep lypa ban pynrung naduh kaba sdang bad uba dei tang ma u ba la lah ban kamai bun ron ha ka jingiakhun kaba dang shu dep bad ka Tripura.

Ka jingiakhun kabna wan ia ka Meghalaya ha ka Ranji Trophy kan dei pyrshah ia ka Maharashtra kaban long ha Aurangabad naduh ka 26 tarik mynta u bnai bad hadien kane, kan wanphai biang sha laiing ban iakhun pyrshah ia ka Jammu & Kashmir kaban sdang naduh ka 6 tarik Naiwieng.

Kine harum ki long ki kyrteng ba pura biang sa shisien jong ka kynhun ialehkai Ranji Trophy ba mynta ka samoi ka MCA: Aryan Borah, Akash Kumar Choudhary, Bamanbha Shangpliang, Bijon Dey, Chengkham Sangma, Dippu Sangma (V-C), Jaskirat Singh Sachdeva, Kishan Lyngdoh (C), Ram Gurung, Roshan Warbah, Lerry G Sangma, Arpit Bhatewara (WK), Ajay Duhan (BCCI approved guest player), Sumit Kumar (BCCI approved guest player), Anirudh B (BCCI approved guest player)

Standbys: Aadarsh Joshi, Anish Charak, Wanlambok Nongkhlaw, Shembhalang Pyngrope, Arien B Sangma Support staff: Prabhakar Bairgond (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer), Dister Marbaniang (Ma