Pynbna ka sorkar iaka jingiarap sha ki lanot twa khyndew ha West Jaintia Hills

Syllad | The Rising MeghalayaOctober 8, 2023

Ka Sorkar jylla ka la bthah ia u Deputy Commissioner ka West Jaintia Hills District ba un ai ia ka jingiarap kaba long T.16 lak, kata kaba mar 4 lak sha kiba haiing hasem jong ki sawngut ki lanot kiba la khlad na ka jingjia twa khyndew hapoh ka shnong Pynthorlangtein kaba hap hapoh Thadlaskein C&RD Block, West Jaintia Hills District.

Kane ka jingjia ba sngewsih ka la wan jia hynne ka step phyrngap jong ka Sngi U Blei hadien ka jingther jong u ‘lapbah kaba la pynlong ia kawei ka longiing ba kan ngat ha ka jingshah tap kaba mar shiteng ha ka  khyndew kaba twa bad  kaba la shim ia ka jingim jong ki sawngut ki dkhot ka longiing, kata kaba kynthup ia u kpa, ka kmie bad arngut ki khun kiba dang rit.

Ia ka met jong kine ki lanot la ioh ban sei noh na kane ka jaka ba la twa da ka jingiarap jong ki nongshong shnong bad na ka liang ki bor sorkar ba dei khmih ki la shimti noh ia ki met ban leh ia kaba donkam.

Halor kane ka jingjia ka sorkar ka la bthah  ruh ia u Block Development Officer, Thadlaskein C&RD Block ba un khmih ha kaba iadei bad kino kino ki lad jingiarap kiba donkam kyrkieh.

Kine ki lanot kiba la ngat ha kane ka jingjia ki dei kiba la tip kyrteng kum u Bah Biangki Phawa  31 snem ka rta, ka kurim kong Pynjanai Ryngkhlem ba 25 snem bad ki arngut ki Khun u Edify Ryngkhlem 6 snem bad i heprit Wiladaroi Ryngkhlem iba dang 3 snem rta.