Pynbna ka sorkar Jylla ban pynkynriah iaka North Jowai Division sha Shangpung, pyrshah u ma Andrew Shullai

Syllad | The Rising MeghalayaNovember 4, 2020

Ka sorkar Jylla kala pymih ka jingpynbna haka sngi ba ar ban pynkynriah iaka North Jowai Division na Jowai sha Shangpung.

Katkum ka jingynbna No.PW/Admn/39/2015/144  la ong ba na ka bynta ka miat ka bha bad ban pynsuk iaka rukom treikam ba kynthup iaka ban shna surok bad maramot surok, u Lat ka Jylla ula ai ka jingmynjur ban pynkynriah iaka Head Quarter jong ka PWD Roads, North Jowai Division na Jowai sha Shangpung.

Nalor kata haka jingpynbna No.PW/Admn/39/2015/144-A: Ha kaba iadei bad ka jingpoynkynriah iaka Head Quarter jong ka PWD Roads, North Jowai Division na Jowai sha Shangpung, u Lat ka Jylla u mynjur ruh ban pynkylla kyrteng iaka North Jowai Division, Jowai kum ka Shangpung Division, Shangpung,

Kane ka hukum kan treikam naduh mynta tad haduh bala pynbna da kumwei.

Halor kane u ma Andrew Shullai, MDC jong ka Jaintia Hills Autonomous District Council (JHADC) ula pynpaw ka jingpyrshah kaba jur halor kane ka rai ka sorkar ban pynkynriah ia ka North Jowai Division na Jowai sha Shangpung.

“Nga kyndit halor kane ka jingpynkynriah jong ka sorkar iaka North Jowai Division haba dangshen kane ka ishu pynkynriah kala jar jar, phewse hynnin ka sngi la pynmih iaka jingpynbna bad kylla ruh wat iaka kyrteng kane ka Division sha ka Shangpung Division,” la ong u ma Andrew.

U Ma Andrew uba long ruh u MDC ka Jowai Central ula pynrem ia u MLA ka Jowai u ma Wailadmiki Shylla uba la pynpaw iaka jingpyrshah tang haka ktien, hynrei ka kam pat kala kren da kumwei.

U Ma Andrew ula ong ba lada kane ka sorkar kaba kwah ban wanrah iaka roi ka par bad ban pynjan iaki tnad sorkar sha ki nongkyndong ka dei ban kyntiew kyrdan da ka Shangpung Sub-Division bad ula buh jingkylli balei ba hap ban rah iaka North Jowai Division kaba dei ka headquarter sha Shangpung kaba don bun ki jaka treikam naduh na Nangbah, Nongjngi bad kiwei kiwei ki shnong.

“Ka sorkar ka pyrkhat ne em iaka rukom treikam kane ka tnad haba ka Shangpung tang ka treasury ruh kam don bad kumno ban pyniaid shakhmat iaki kam ki jam ha kaba dei ban siew ban tda iaki bill ki kontrak,” la ong u ma Andrew.

“Na kaliang jong nga nga pynpaw ka jingpyrshah kaba jur namar ba kane kan wanrah ka jingeh iaki nongtrei ki kontrak namar kane ka dei tang ka jingpynthud iaka rukom treikam ka tnad PWD bad kadei tang ka jinglehbor ka sorkar bad knieh bad pynduh ia kaba la don lypa,” la ong ma Andrew.