Pynbna ka UDP ia ka thup ba nyngkong ki 26 ngut ki kyrtong sha ka elekshon MDC na KHADC bad JHADC

Syllad | The Rising MeghalayaDecember 13, 2024

Ka United Democratic Party (UDP) ha ka 13 tarik Nohprah ka la pynbna ia ka thup kyrteng kaba nyngkong jong ki 26 ngut ki kyrtong ki ban mih iakhun ha kane ka elekshon Autonomous District Council (ADC) ka ban long ha u snem u ban wan, kata 16 ngut sha ka KHADC bad 10 ngut sha ka JHADC.

Haba kren sha ki lad pathai khubor hadien ka General Council Meeting u president ka UDP u Bah Metbah Lyngdoh u la ong ba ka party ka la iaid shakhmat ha kaba iadei bad ka jingpynkhreh na ka bynta kane ka elekshon ka ban wan.

“Mynta ngi la pynbna ia ka thup kyrteng kaba nyngkong jong ki kyrtong hadien ka jingbishar bniah bad pynshong nongrim halor ki jingai jingmut bad ki jingtyrwa na ki constituency bapher bapher,” u la ong.

Katba ia ka thup kaba ar jong ki kyrtong yn sa pynbna lehse hashwa jong ka Khristmas, ong u Bah Metbah da kaba bynrap, “Ngin pyrshang ban pynthikna ba ngin pynieng kyrtong na baroh ki 29 tylli jong ki artylli ki ADC -KHADC bad JHADC.

Ka UDP ka la rai ruh ban ym iatreilang bad ka paralok RDA jong ka, ka Hill State People’s Democratic Party (HSPDP) hynrei ban iakhun ha la ka jong ha kane ka elekshon MDC ka ban wan. Une u nongialam ka UDP u la kdew ruh ba ka party ka la sakhi na ki jingbakla kiba la dep khamtam ha ka MP elekshon 2024.

Ha kajuh ka por u Bah Metbah u pynpaw ka jingsngew skhem ba ka party kan lah ban lehbha ha kane ka elekshon ka ban wan da kaba pynshong nongrim halor ki jingshisha ba ka la lah ban leh ia shibun ki kam ba bha ha ka por ba ka la ialam ia ka Executive Committee ha KHADC.

“Ka EC jong ngi ka la shim shibun ki mat kiba kongsan ia kiba la lah ban pyntreikam bad mynta kiba la long ki ain ban iada ia ka jingmyntoi jong ki trai ri trai muluk,” ong u Bah Metbaha da kaba bynrap, “Mynta ha ka General Council Meeting ngi la shm ia ka rai ban leitphai sha ki paidbah da kaba pynshong nongrim halor ki mat bad ki rukom treikam kiba ngi la leh ha ka por ba ngi don ha ka EC ba la ialam da ka UDP ha KHADC.”

Ha kajuh ka por u la ong ruh ba um iohi satia ba ka lyer ka VPP kan don jingktah ha ki elekshon sha ki ADC.

Ki 16 ngut ki kyrtong sha ka elekshon KHADC ki long: Desmond KL Mawlong – Nongthymmai, Mitchel Wankhar – Laban-Mawprem, James Ban Basaiawmoit – Mawkhar -Pynthorumkhrah, Auguster Jyrwa – Jaiaw, Titosstarwell Chyne – Sohra, Barikupar Synrem – Shella, Matthew Beyondstar Kurbah – Mawphlang – Diengiei, Naphistista Marwein – Umroi, Mawhati – James Sylliang, Eddie G Karbani – Umsning, Nongpoh – Balajied Ranee, Pius Marwein – Largrin, Jessland Roy Nongsiej – Mawkyrwat, Sranly Rongrin – Mawshynrut, Equator Nongrang – Mairang-Nongkhlaw, Jambor War – Pariong- Mawthadrashan.

Ki 10 ngut ki kyrtong sha ka elekshon JHADC ki long:  Lomris Lyngdoh – Muthlong -Sohkymphor, Joinriwell Pyrtuh – Bataw Lakadong, Lasky Rymbai – Tuber-Wapung-Shnong, Finelynes Bareh – Rymbai-Khliehriat, Rollinson Dkhar – Sutnga-Narwan, Eleazer C Dkhar -Shiliangmyntang, Winning Garland Sungoh – Mowkaiaw, Fernando Sumer – Saphai, Riio Sten-Barato – Mukroh, Marki Mulieh – Jowai-North.