Pynbna ka WJSU iaka tarik eksam scholarship

Syllad | The Rising MeghalayaSeptember 15, 2024

Ka War Jaintia Student’s Union (WJSU) kala pynbna iaka tarik eksam ‘1st War Jaintia Scholarship Examination 2024’ na ka bynta ki khynnah kiba pule haka kyrdan Lower Primary School bad Upper Primary School jong ka thain War Jaintia.

Ka tarik ban iakhun ia kane ka eksamin kan long haka 14 Nohprah 2024 haki 14 tylli ki jaka thoh eksamin bad ha kajuh ka por kala pynbna ruh ba iaka khusnam Scholarship yn sam ha ka 21 tarik Nohprah 2024 ha Amlarem.

Ia kane ka rai pynbna la shim haka jingialang kaba la khot pynlong da ka War Jaintia Student’s Union (WJSU) kaba la shim bynta da ki Principals, Headmasters, Headteachers jong ki skul bapehr ka thain War Jaintia ha Riwar Jaintia Church of God School, Ladjaplem haka 14 tarik Nailur.

U Bah Alban K Gashnga, nongaibuit ka seng haka jingialang ula iathuh iaka jingthmu jong ka WJSU ban pynlong iaka Scholarship Examination ka long ban wad iaki khynnah naduh dangrit kiba don ka sap ka phong haka liang ka pule puthi ban ai ka jingiarap pisa ha ka dur ka scholarship.

Nalorkata, ban pynmlien ia ki khynnah naduh dangrit ba kin mynlen ia kiba kum kine ki jait Competative Exam khnang ba ynda ki lah heh kyrdan kin mynlen bad kin jop iaki jingpule haka jingim ka jong ki.

Ula ong ba ka WJSU ka khmih lynti ba lyngba ka jingpynlong ia kum kine ki competitive exam ka thain War Jaintia kan sa lah ban sei ia shibun ki ophisar kum ki IAS, IPS, MCS bad MPS haki sngi ki snem ki ban dang wan namar kumba long mynta kiba bun hi ki khynnah pule jong ka thaiñ wat tang 5 percent kim kot bor haba ianujor bad ki khynnah pule haki jaka sor.

U Bah K Rymbui (Retd SP) uba dei ruh u Advisor jong ka seng bad u president ka seng Jambok Lanong kila kyntu ia ki nonghikai ban rah ia kane ka khubor bad ban pynsngewthuh iaki kmie ki kpa jong ki khynnah ban pynshlur iaki khun ban iashim bynta ha kane ka competitive exam bad ban kyrshan ia ka seng khnang ba ka jingpynlong ia kane ka scholarship examination kan long kaba jop.

Ha kane ka jingialang na ka liang ki nonghikai kila pynpaw ba ki long kiba la kloi ban kyrshan ia ka seng na ka bynta ban pynurlong ia kane ka jingthmu ba bha jong ka seng na ka bynta ka lawei ba phyrnai jong ki khynnah.

Kiwei de kiba la ai jingkren ki long u Education Secretary A Sumer, u General Secretary Everest Langstang nalor kiwei.