Pynbna ki nongtrei ASHA da ka jingiakhih ba khlem pud ba leh bym suitniew ka sorkar ia ka jingdawa

Syllad | The Rising MeghalayaNovember 8, 2023

Ki nongtrei ASHA ha ka jylla hapoh ka lama jong ka Meghalaya Accredited Social Health Activist Workers’ Union (MASHAWU) haka sngi ba Ar ki la shim ia ka rai ban bteng ia ka jingiakhih ba khlem pud shibynta ban pynpaw pyrshah ia ka jingleh bym suitniew jong ka sorkar jylla ha kaba iadei bad ka jingdawa ban kyntiew ia ka bainong ne ka honorarium na ka bynta jong ki.

Kane ka jingshim rai ka la wan long ruh shisngi hadien ba ka sorkar jylla ka la pynpaw ia ka jingbym lah ban ai ia kano kano ka jingpynthikna sha ki nongtrei ASHA kiba pynlong jingiakhih da kaba shong jahthait ha la iing, kata halor ka nongrim ba ki la dep lypa ban ioh pdiang ia ka jingsiew kaba biang kumba la pynpaw da ka Myntri ka Tnat ka koit ka khiah ka Kong Ampareen Lyngdoh ha kaba iadei bad kane ka jingdawa ka jong ki.

Kane ka jingpynpaw na ka liang ka sorkar kala long hadien ka jingialang bishar kam ba la khot pynlong da u Myntri Rangbah ka jylla u Conrad K Sangma bad ka Myntri ka Tnat ka koit ka khiah nalor ki heh na ka Tnat ka koit ka khiah ka sorkar jylla.

Haba kren sha ki lad pathai khubor ka president ka Union ka kong  Marajune Myrsing ka la ong, “Ngi la shim ia ka rai ban pynlong da ka jingiakhih kaba khlem pud tad haduh ban da lah ban pynurlong ia kane ka jingdawa ka jong ngi.” “Ngi dawa na ka sorkar ba kan kyntiew ia ka honorarium sha ka T.5000 na ka T.2000 kaba ki ju ioh,” ka la ong.

Da kaba kyntait ia ka jingkam jong ka Myntri ka tnat ka koit ka khiah ba ki ASHA ki ioh ia ka jingsiew kaba biang, ka Adviser jong ka Union ka Kong Sonny Kharjana ka la ong ba; “Lada ki don 200 ngut ki ASHA tang iwei ne ar ki ban ioh ia ka jingsiew kaba T.7000 lane T.8000 namar baroh ka shong ha ka jingbun briew. 

Ka Kong Sonny kala ong ruh ba ki ASHA hadien ba ki la shimti ia kane ka kam kim lah shuh ban leit bylla shawei pat bad dei namar kane ka buh jingeh ia ki ban pyndap ha ïing hasem tang da ka bai nong ba ki ioh na ka kam ba ki leh ha la ki jong ki shnong ki thaw.