Pynbna ki nongtrei SSA da ka jingiakhih ba khlem pud halor ka jingdawa pynkiew tulop

Syllad | The Rising MeghalayaJuly 26, 2024

Ka All Meghalaya SSA Non-Teaching Staffs Association (AMSSANTSA) ha ka 25 tarik mynta u bnai ka la pynbna ban pynlong da ka jingiakhih shong kyllain mungor ba khlem pud naduh ka 29 tarik mynta u bnai ban pynpaw pyrshah halor ka jingpulom jong ka sorkar Jylla ban kyntiew ia ka tulop jong ki nongtrei SSA Non Teaching Staff ha ka Jylla.

Ka Seng lyngba u kyrwoh ka pyntip ba ka la shim ia kane ka rai pynlong jingiakhih ha ka jingialang kaba la long ma Madan Malki, Shillong ha ka 25 tarik mynta u bnai.

“Ngi la shim ia ka rai ban pynlong jingiakhih da kaba shong kyllain mungor kaba khlem buh por naduh ka 29 tarik mynta u bnai (Sngi Nyngkong) tad haduh ba ka Sorkar kan long la khreh ban pynurlong ia ki jingkular ki jong ka ban kyntiew ia ka tulop ka jong ngi kaba la sahteng naduh u snem 2016,” ong ka Seng.

Nalor kata ka Seng ka pynkynmaw ruh ba na ka liang u Myntri ka tnad Pule Puthi u Rakkam A Sangma ha ka jubab ka jong u hapoh ka Iingdorbar thaw Ain ha u 2023, u la pyntip ba ka tnad ka la dep ban phah ia ka file kaba iadei bad ka jingtyrwa ban kyntiew ia ka tulop jng ki nongtrei SSA Non Teaching Staff sha ka tnad Finance, hynrei kaba sngewsih ka long ba haduh mynta ym pat shym la leh ei ei ha kaba iadei bad kane ka bynta.   

“Kane ka pyni shai ba u (Rakkam) u la shu kular thok bad shu pynbiej ia ki dkhot jong ka Iingdorbar thaw Ain.Hynrei, watla katta na ka liang ki nongtrei Non Teaching Staff ki la long kiba la pynkhreh ban iakhun na ka bynta la ka jong ka hok,” bynrap ka Seng.