Pynbna kyndon pyrkhing ka Laitkor Dorbar Pyllun | Pule ban tip iaki kam dei ban leh bad bym dei

Syllad | The Rising MeghalayaMay 20, 2021

Ka Laitkor Dorbar Pyllun ka pyntip sha phi baroh ki nongshong shnong ki ba hap hapoh u pud u sam jong ka Laitkor Pyllun ba hadien ba ka Sorkar lyngba ka District Administration ka la pynjari ia ka total lockdown kaba la sdang naduh ka 8 baje janmiet jong ka 19/05/2021 haduh 5 baje mynstep jong ka 31/05/2021 na ka daw jong ka jingkiew sted jong ki briew kiba iabit khlam.

Tang haka Laitkor Dorbar Pyllun ka jingdon ki briew kiba iabit khlam Covid-19 kala kynjoh sha ka 52 ngut bad da ki spah ngut ki High Risk Contact nalor kiba la duh ei iaka jingim na kane ka jingpang khlam.

Halor kane ka Laitkor Dorbar Pyllun kala pynbna ba kala buh iaki kyndon pynjari ban pyrkhing ia ka iaid ka ieng u paid nongshong shnong bad kine harum ki dei ki kyndon:

Ym bit da lei lei ruh em ban mih na la ki iing ki sem bad ba ki paid nong shong shnong kin ia shong khop ha la ki iing ki sem bad ki phyllaw iing lajong.

La khang pyrshah ia ki paidbah ban mih na la iing ban ia leit saitjain, leit thoh dieng, leit bylla sngi, leit kheit jhur lane leit thied jingthied.

La khang pyrshah ia baroh ki kali ban ieng kai ha ki surok bah lane ki surok shnong ha kane ka por ba la pynjari ia ka total lockdown.

Ki paidbah nongshong shnong kim dei ban khuslai ha ka ba iadei bad ki jing donkam jong ki mar bam mar dih bad ba kin shu phone sha ki trai/nongap dukan ha ki Sngi ba ailad ka Sorkar ban plie dukan bad yn sa pynpoi ia ki jingdonkam sha ki iing lyngba ki volunteers ba la pynbiang da ka bor Shnong. Dei ban phah wanrah ia ki tiar tang ki ba donkam eh bad ban pyrshang kat lah kat iai ban phah wanrah tiar tang shi sien shi sngi.

La maham tyngeh ia baroh ki nongshong shnong ba kum ha kane ka por ba u khniang jingpang Covid-19 u dang pur sted ba kim dei ban phah wan kai iaki paralok parajor, ki bahaing bahasem ne ki para marjan marpa bad ban ia rung na kawei ka iing sha kawei pat bad lada lap ia kiba leh pyrshah ia kane yn hap ban aiti sha ki bor jong ka ain.

Lada don kino kino ki ba pang ba shitom bad ki ba donkam ban leit shim dawai kin hap ban pyntip tang lyngba ka phone ia ki nong pyniaid Shnong. Ym bit da leilei ruh em ban wan mih sha iing ne ki ophis jong ki nongkitkam Shnong.

Lada don kino kino ki jingjia ka ba sngewsih, ha Shnong ha thaw ki trai iing ki hap ban pyntip sha ki bor Shnong bad bud ryntih iaka protocol bala pynjari da ka Health Depatment ryngkat bad ka jingpeit ngor jong ki Nongpyniaid Shnong.

Ki nongshong shnong ki ba la kynjoh ia ka 45 snem shaneng ki dei ban register noh ialade bad ban shim ia ka tika ban iada ialade na une u khniang jingpang. Ki nongshong shnong ki lah ban register da ka ba ai kyrteng sha ki Asha Anganwadi ki ba dei peit ia ka shnong jong phi bad ka jing ai tika kan dei ha ka Subcentre ka ba don ha Laitkor Rngi.

Katkum ka hukum jong ka Sorkar la shah ban mih na iing tang ia ki nong trei jong ka Health, Police and security forces, ki ba die dawai, ki jingtrei lait, nong shna um, municipal, ki nong trei ha ki lad pathai khubor.

Lah shah ruh ia ki ba supply gas ban plie ha ryngkat ka jing peit pyrman lang jong ka Dorbar Shnong, ka CCMT bad u Incident Commander.

La ailad ia ki kali kit um ki ba na Shnong ban pynpoi um sha ki longiing ki ba donkam um naduh ka por 7 baje mynstep haduh 5 baje janmiet bad ki dei ban deng bha ia ki mask bad gloves bad bud ryntih ia ki protocols ba la buh da ka Sorkar.

Lada lap ba don ka jing leh pyrshah na ka liang jong ki ba la bakla, ka Dorbar Shnong kan ym don da kawei pat ka lad bad ngin hap ban pyntip sha ki bor jong ka ain ban leh ia ka ba donkam.

Halor ki kyndon ba la bthah da ka Laitkor Dorbar Pyllun bad ka tnat jong ka koit ka khiah, la kyntu ia phi iwei pa iwei ba phin long ki ba adkar bad phikir bha ialade kum ha kane ka por ba kat nang mih ki sngi ka jing saphriang jong u ne u khniang jingpang ka la nang kiew sted, te kumta sngewbha ba phin don ka jing sngewthuh ban iada shwa ialade da lade nangta ia ki marjan marpa bad kumjuh ruh ia ka Shnong ka thaw.

Ka Laitkor Dorbar Pyllun ka khot iaka jingiatreilang jong baroh bad shim khia ban bud ryntoh iaka kyndon bad ban long phikir shwa ba kan wan jia kaei kaei ka ba ktah ia ka imlang sahlang hapoh ka shnong ka thaw jong ngi.