Pynbna paidbah iaka jingtohkit halor ka jingshah pyniap bad suba shah lehbeijot ka khynnah skul ha EJH ong ka AJYWO iaki pulit

Syllad | The Rising MeghalayaJanuary 25, 2021

Ka All Jaiñtia Youth Welfare Organisation-East Jaintia Zone (AJYWO-EJZ) ka la dawa na u Superintendent of Police, East Jaintia Hills District ban pynmih pyrthei ïaka jingtohkit haba ïadei bad ka jingjia shah pynïap bad suba shah lehbeijot ka khynnah skul haka thaiñ East Jaintia.

Ka AJYWO kala ai da ka dorkhat ha u SP East Jaintia Hills bad la phah kopi ruh sha u Deputy Commissioner ka East Jaintia Hills haka sngi Nyngkong.

Katkum ka dorkhat ka AJYWO ka la dawa ruh ban pyndep noh kloi ïaka jingtohkit bad pynshitom katkum ka aiñ ïa ki riew runar kiba donkti ha katei ka kam.

Ka AJYWO kala ong ba ki don ki briew kiba la shah rah ban shah tohkit haki pulit, hynrei ym tip la ki dei ne em kiba donkti bad kala dawa na ka tnad pulit ban pynsted iaka jingtohkit ban pynshitom iaki runar khnang ba katei ka khynnah kan ioh ka jingbishar kaba hok.

Lah ban pynkynmaw ba ka jingshah pynïap katei ka khynnah kaba dang shong haka klass IX ka la jia haka 16 tarik Nohprah 2020.