Pynbna u Bah HM Shangpliang ban leit pyniasoh sha ka NPP ba u iohi iaki jingkylla haka jingialam u Conrad

Syllad | The Rising MeghalayaSeptember 7, 2023

U MLA barim ka Mawsynram u Bah Himalaya M Shangpliang mynta ka sngi u la pynbna ia ka rai ba un leit ban pyniasoh bad ka party synshar National People’s Party (NPP), kata ha ka jingialang ka ban long ha ka 13 tarik mynta u bnai hapoh ka headquarter ophis jong ka party.

Haba kren sha ki lad pathai khubor u Bah Shangpliang u la ong ba u pynpaw shai ba un leit ban pyniasoh sha ka NPP khlem kino kino ki jingeh kyndon, bad ba mar ia rung ha ka party un dei u dkhot jong ka bad kloi ban shim ia ka jingkitkhlieh.

Ha kaba iadei bad ka Lok Sabha ilekshon ka ban wan, u Bah Shangpliang u la ong ba un ieh ia kane ha ka jingbishar bad ka jingstad jong ki nongialam ba halor jong ka NPP.

Hadien ba u la mih noh na ka Seng BJP une u MLA barim u la ong ba u la shim ia ka rai ban pyniasoh sha ka NPP hadien ba u la iohi kumno ba u Myntri Rangbah ka jylla u Conrad K Sangma u la lah ban wanrah ia ki jingkylla ia shibun ki kam pynroi ha ka jylla Meghalaya ha kine ki san snem kiba la dep.

“Kumta Nga ngeit ba dei tang ka NPP ka party ha ka jylla kaba lah ban ai ka jingshngain ia ki paidbah ka jylla, kata ha ka liang ka roi ka par ba ka lawei kaba phyrnai,” ong u Bah Shangpliang.

Nalor kata u Bah Shangpliang u la kam ruh ba palat 2000 ngut ki nongtrei ka party kiba don ia ka jingkitkhlieh hapoh ka Mawsynram BJP Mandal ki la phah ia ki shithi iehnoh kam sha u president ka jylla bad ba kin pyniasoh noh ia lade sha ka NPP ha ka jingialang ka ban long ha ka 12 tarik mynta u bnai ha Mawsynram.

Ha kajuh ka por une nongmihkhmat barim ka Mawsynram u la kyntait ruh ia ka jingkam jong u president ka BJP ka jylla u Bah Ernest Mawrie ba u kwah ba ka MDA kan pynmih ia u kyrtong iamon lang na ka bynta kane ka ilekshon Lok Sabha ka ban wan. “Ngam pat ju iakren halor ka kam Lok Sabha ilekshon bad u Bah Mawriew, bad ngam pat shym la pan tiket lane ban don kano kano ka jingiakren ha kaba iadei bad u kyrtong ia mon lang,” ong u Bah Shangpliang.

Ha kaba iadei bad ka jingkynnoh leh shilliang ne iarap tang ia ki ba haïing hasem u bah Shangpliang ula ong ba ka jingioh president Mawsynram Mandal uba haiing ka dei namar naduh shwa ban rung sha ka BJP ki la dei lypa ki nongialam ba rangbah bad ia kane ka rai ruh la soi da u president ka Meghalaya BJP. U la ong ruh ba namar ka jingjur ki kam noh shilliang ia kiba haïing  hasem bad ka jingjur palat ka jingiashrut hapoh ka Party, kumta u la shim ia ka rai ban mih noh naka BJP khnang ba un lah ban bteng ha kaba iadei bad ki kam shakri paidbah.