Pynbna u CM ban bei ka Sorkar T.4000 klur ban tei ia ki kam jngohkai pyrthei

Syllad | The Rising MeghalayaNovember 18, 2024

U Myntri Rangbah ka Jylla u Conrad K Sangma ha ka 18 tarik u Naiwieng u la ong ba ka sorkar Jylla kan bei pisa haduh kumba T.4000 klur na ka bynta kiba bun ki jingtei kiba iadei bad ki kam jngohkai pyrthei, kata kaba kynthup ia ki hotel, homestay bad kiwei pat ki jingtei ki ban kyntiew ia ka kam jngohkai ha ka Jylla.

Ia kane u Conrad u la pynbna ha ka jingplie ia ka Shillong Literary Festival kaba saw ha Wards Lake, Shillong, ha kaba la sakhi ia ka jingwan iashim bynta jong ki nongthoh kot ba pawkhmat kum ka Shobhaa De, u nongthoh kot bad myllung ba pawkhmat ka ri u Vikram Seth uba la ioh pdiang ia ka khusnam Padma Shri lem bad kiwei kiwei.

Ha ka jingkren plie u Myntri Rangbah u la ong ba ka thong ba hakhmat eh jong ka Literary Festival ka long ban ai ia ka rynsan lang na ka bynta ki nongthoh kot ka jylla ba kin lah ban pynpaw pyrthei ia la ki jong ki sap ki phong ryngkat ki nongthoh kot ba pawkhmat na kylleng ki jylla jong ka ri bad ka pyrthei bad ka ban pynshlur ia ki ba kin iasam ia ki jingtrei ki jong ki.

U la bynrap ruh da kaba ong ba ka long ruh ka lad ka kabu ia ki nongthoh kot kiba dei ki trai ri trai muluk ba kin lah ban pynpaw pyrthei ia lade bad iasam lem ia ki jingmut jingpyrkhat jong ki bad ki nongthoh kot na kiwei pat ki bynta jong ka ri bad wat na kiwei pat ki ri ka pyrthei.

U la ong ruh ba kawei pat ka jingthmu jong kane ka tamasa ka long ban wanrah ia ka jingsngewtynnad ha kaba pule kot bad ban pynshlur ia ki briew ki jong ngi ba kin sngewtynnad ban thoh kot. “Ngi la ban jur ia ki skul ba kin iashim bynta namar kan pynmih ia ka jingangnud hapdeng ki khynnah pule ban pynrung ia ka jingangnud bad sngewtynnad ban pule bad ban thoh kot.”

Haba pynpaw halor ki jingpyrshang jong ka sorkar ban weng ia ki jingeh kiba iadei lyngba ki tamasa kum ki ‘Literacy Festival,’ u Conrad u la ong, “Ka Meghalaya ka dei kaba don bun eh ki nongshong shnong kiba dei ki samla haba ianujor bad kiwei pat ki bynta jong ka ri bad ngi pyrshang ban pynthikna ba ka jingpule bad thoh kan long ka bynta kaba kongsan jong ka roi ka par na ka bynta ki samla jong ngi.

U Myntri u la pynpaw ba ka thoh ka tar ka long ruh ka kad ban buh jingthoh bad wad bniah na ka bynta ban pynneh pynsah ia ka koshor bad ka histori ba riewspah jong ka jaidbynriew jong ngi.Nalor kata u la pynpaw ruh ha kaba iadei bad ka CM Scholars Prokram kaba aijingkyrshan ia 50 ngut ki research scholar ban buh jingthoh noh ia ki kolshor jong ki Jaidbynriew riewlum ka Jylla Meghalaya.