Pynbna u CM ban kyntiew ia ka jingialehkai phutbol; T. 3 klur yn iarap ia ki Club ba leit sha I-League

Syllad | The Rising MeghalayaAugust 2, 2024

U Myntri Rangbah ka Jylla u Conrad K. Sangma u la pynbna ban pyntreikam ia ka Local Football Club Support Scheme kaba thmu ban kyntiew ia ka kam ialehkai phutbol ha ka Jylla.

Kane ka sienjam kan iarap ban kyrshan pisa ia ki Club kiba tbit ki ban leit iashim bynta sha ka I League 2 shaneng ki lah ban ioh ia ka jingiarap ka ban kot haduh T. 3 klur, katba ki Club shnong /intermediate ka Jylla ki lah ban ioh ia ka jingiarap pisa ka ban kot haduh kumba T.15 lak.

Ia kane u Myntri Rangbah ka Jylla ula pynbna haba kren ha ka jingialang plie ia ka Shillong Leg jong ka 133rd Indian Oil Durand Cup, kaba sdang ha ka 2 tarik mynta u bnai hapoh JN Complex, Polo, Shillong.

Naduh ba sdang pyntreikam ia ka State Sports Police ha u 2018, ka tnad Sports & Youth Affairs ka Jylla kala lah ban leh shibun kiei kiei. Kine ki kynthup ia ka jingtrei ia ki madan ialehkai ha kylleng ka Jylla, ka jingpyntreikam ia ka prokram Talent Identification and Nurturing Scheme kum ka STAR Prokram bad kumjuh ruh ban pynlong ia ki lympung ialehkai ka Jylla, ka Ri bad ki Ri ka pyrthei.

Haba kren sha ki lad pathai khubor hadien ka jingialehkai jong ka Durand Cup, u Conrad ula ong “Ngi kyrpad ia ki nongshong shnong ka nongbah Shillong ba kin iamih paidbah ban wan sakhi ia ki jingialehkai jong kane ka lympung “Durand Cup”.

Nalor kata u la ong ruh, “Ngi sngekmen shibun ban pyndonkam ia kane ka sngi na ka bynta ban sam ia ki jingtip halor ki sienjam ba la sdang da ka Sorkar ha ka phutbol bad kiwei ki jingialehkai ha ka Jylla. Ki jingpynlut ha ki jingtei, ki lympung ialehkai bad ki grant kim dei satia ki jingpynlut hynrei ki dei ki jingkynshew ha ki samla jong ngi” ula ong.