Pynbna u CM ban sdang ban pyniasoh bad ka internet iaki tiar bad buh jingthoh iaki nongtrei haka workshop on Emerging Technologies

Syllad | The Rising MeghalayaApril 25, 2025

U Myntri Rangbah ka Jylla, u Conrad K Sangma ha ka 24 tarik Iaiong ula plie paidbah online iaka workshop kaba ar sngi kynthih halor ka Emerging Technologies ha ka jingialang kaba la long hapoh State Convention Centre, Shillong, da kaba buh ia ka lynti iaid kaba pynkylla ia ka lawei jong ka digital ha Meghalaya.

Kane ka workshop ba la pynlong da ka Tnad Information Technology & Communications (IT&C) ka sorkar Meghalaya ha ka jingiatreilang bad ka National e-Governance Division (NeGD), ka la wanrah lang ia ki nongthaw polisi, ki riew shemphang bad ki nongiashim bynta ha kylleng ka ri.

Ha ka jingkren u CM u la ban jur halor ka jingkiew jong ka technology ha ki kam aijingshakri da kaba batai ia ka kum ka atiar kaba khlain ban weng ia ki jingeh bad ban pynbha ia ki kam shakri paidbah. U la kdew ia ka jingjop jong ka e-Proposal jong ka Meghalaya bad ka rukom pyntreikam bad pynkynriah ia ki file digital hapoh ka Meghalaya Enterprise Architecture (MeghEA), kiba la pynlah ban shim ia ki rai khlem jingeh, kata wat na ka mobile phone.

“Ngi la iaid na ki file kot sha ka digital ha ka por kaba shisha. Ka Technology kam dei shuh tang kum ka tiar aijingkyrshan hynrei ka bor kaba pyniaid iaki kam aijingshakri sha ki paidbah,” ong u CM.

U la pynpaw ia ka jingkiew kiba kongsan lyngba ka jingstad technology, kaba kynthup ia ka jingpynduna kaba haduh 50% halor ka jingkhlad jong ki longkmie ha ka por kha khun, kata da kaba buddien lyngba ki kot digital ban aijingkyrshan ia ki longkmie armet kiba don hapdeng ka jingma kaba khraw. U la pynbna ruh ban pyntreikam ia ki IoT sensor ha ki 70,000 tylli ki umpohliew ban ioh ia ki jingtip ba thikna ha ka por kaba biang, ban iarap ia ka jingpynneh pynah ia ki um ki wah.

Kawei pat ka sien kaba kongsan ba la pynbna ka long halor ka jingpynrung ia ka Blockchain based employee data bad promotion tracking system, ka ban sdang na ka Tnad pulit. Kane u la ong kan pynsuk ia ki rukom treikam, kan pynduna ia ka jingpynslem bad ban kyntiew ia ka jinglong khuid ha ka rukom pyniaid ia ki kam ki jam.

Haba phai halor ki nuksa ba la shim na ka jingleit ba dang shen sha Japan, u Conrad u la kren ruh halor ka jingthmu ban pyndonkam ia ka AI bad Robot ha ka kam rep ne ha ki Greenhouse Farming ha ka jylla. U la pynpaw ia ka jingthmu ka jylla ban pyndonkam da ki bor ‘Virtual Reality’ ha ki kam jngohkai ban pynpaw ia ka jingriewspah jong ka jylla ha ka liang ka kolshor bad ki jingdon jingem kiba hiar pateng.

Haba pynthikna ia ka jingkut jingmut jong ka sorkar ban pynlong ia ka Meghalaya ka jaka pdeng ha ki jingshakri ha ka liang ka IT bad Digital hapoh ka thain Shatei Lammihngi, u Conrad u la pynpaw halor ki jingtei ki ban wan kum ka jingpynheh ia ka Shillong Tech Parks, ka jngtei ia ki Five Stat Hotel, ka jingpynheh ia ka Ka Liengsuin bad ka jingpyniar ia ki fiber-optic networks ban kyrshah nia ka digital ecosystem. U la pynpaw ruh halor ka jingdonkam ia ka jingiatreilang bad ka NeGD, India AI bad kiwei ban pynthikna halor ka jingkiew ha ka liang ka technology ha kylleng ka jylla, kata naduh ki jaka sor haduh ki thain kiba kyndong tam.

Katba u Chief Secretary ka Jylla u Bah D.P. Wahlang u la iaroh ia ka jingkylla kaba stet jong ka jylla sha ka digital, da kaba kdew ïa ka jingktah jong ki e-file system ha kaba pynsuk ia ki kam sorkar. U la iathuh kumno ki dashboard digital ki la bujli ia ki file kot kiba heh, kaba pynlah ban shim ia ka rai kaba tang shisien shim. U Bah Wahlang u la kdew ruh ia ka Drone Technology Lab jong ka Sorkar Jylla, kaba la pyndonkam mynta ha ka high-resolution mapping na ka bynta ki bynta kum ka kam tih mawshun, ki khlaw ki btap, bad ka kam jngohkai pyrthei, ryngkat bad ka jingpyniasoh lang ia ka Virtual Reality ha ka jingpule aiñ ha ka National Law University ha Shillong. U la ban jur ia ka jingdonkam ban tei ia ka digital ecosystem kaba kynthup lang ia baroh, da kaba kdew sha ka jingpyniasoh kaban sa wan jong ka ktien Khasi bad Garo ha ka rynsan Bhashini ba la pyndonkam da ka AI.

Kiwei pat kiba la aijingkren lyngba ka online ki kynthup ia u Nand Kumaram, President and CEO of NeGD, bad kiwei pat kiba la ia don lang ha kane ka jingialang plie ki kynthup ia u Pravin Bakshi, IAS, Commissioner & Secretary, IT&C; Kong Idashisha Nongrang, IPS, Director General of Police; R.S. Gill, IFS, Principal Chief Conservator of Forests & Head of Forest Force; K.L. Nongbri, Joint Secretary, IT&C Department; bad Dinesh Didel, Director Technology Management, NeGD.

Ha kane ka jingïalang la ïohi ïa ka jingïashim bynta ba shlur na ki heh ophisar ha kylleng ki tnad sorkar bapher bapher, ka National Informatics Centre (NIC), ka tnad Telecommunications (DoT), ki jaka pule kum ka IIM Shillong, NIT Meghalaya, bad ka North-Eastern Hill University (NEHU), ha ryngkat ki nongmihkhmat na ki Startup bad ki sengbhalang. Ha kane ka jingïalang kaba ar sngi kan don ïa ki jinghikai kiba bun jait kiba pynleit jingmut ha ka Artificial Intelligence, ka Blockchain, ka jingïada ïa ki kor ki bor, ka UX ha ka jingsynshar, bad ki jingpynkhreh paidbah. Ka jingthmu ka long ban pynkhlaiñ ïa ka jingsngewthuh bad pyntreikam ïa ki kor ki bor kiba dang mih ha kaba ïahap bad ka Digital Meghalaya bad ki jingthmu jong ka ri kum ka Digital India bad ka IndiaAI.