Pynbna u CM ban thung da ki trai shnong kum ki ‘Tourist Assistant’; pyllait paidbah iaki tarik tamasa synrai ha Jylla

Syllad | The Rising MeghalayaAugust 15, 2024

U Myntri Rangbah ka Jylla u Conrad K Sangma ha ka 14 tarik Nailar u la pynbna ba ka Sorkar kan thung da ki trai shnong kum ki ‘Tourist Assistants’ ne ki nongbtin lynti ia ki nongwan shangkai pyrthei (tourist) khnang ba kan don ka jingshngain ia ki briew kiba wan na shabar ka Jylla.

“Ka thong hi ka long ban pynlong ia ki tourist ba kin sngew shngain bad ban pynthikna ba ki ioh ia ki jingtip kiba dei biang lyngba ki ‘Tourst Assistant,” ki ban phong ruh da ki uniform,” ong u CM haba kren ha ka jingialang iamir jingmut bad ki kynhun kiba pyniaid ia jngohkai pyrthei ha State Convention Centre, Shillong.

Na ka liang u CM u la pynpaw ruh halor ka jingjia ba dang shen kaba la ktah ia ka kam jngohkai pyrthei da kaba iai ban halor ka jingdonkam ban iatylli lang ban ialeh pyrshah ia kiba kum kine ki jingjia. “Ngi dei ban iatreilang ban pynrem ia kiba kum kine ki jingjia bad ban shim ia baroh ki sienjam ban ialeh ban khring ia ki nongwan shangkai pyrthei,” u la ong.

“Ngi la iakren bad ki nongialam shnong, ki sengbhalang bad ki kynhun ba don bynta ha ki kam jngohkai ban kyntiew ia ka kam jngohkai pyrthei hapoh ka Jylla. Ha kine ki hynriew snem kiba la leit noh ka sorkar ka la wanrah ia kiba bun ki kam ban kyntiew ia ki kam jngohkai pyrthei khnang ban pynpaw nam ia ka Meghalaya,” u la bynrap.

Nalor kata u Conrad u la kyntu ruh ia ki kynhun kiba ia don bynta ba kin aijingmut lang khnang ban lah ban kyntiew shuh shuh ia ki kam jngohkai pyrthei. “Ka jingthmu ka jong ngi kam dei satia tang ban kyntiew ia ka jingdon jong ki nongwan shangkai hynrei ban thaw ruh ia ki kynhun ki ban ialam sha ki jaka shangkai kiba kham phylla nalo kiwei pat ka ban pynkmen shibun ia ki nongwan shangkai.”

Na ka liang ka sorkar ka dang bteng ban shna pynheh bad pynbha ia ki jingtei ha ki jaka jngohkai, kynthup ruh ia ki hotel, resort, restaurant, ki jaka sah, jaka bam, ki jaka iaid kai bad museum.

Shuh shuh ha katei ka jingialang u Myntri Rangbah bad u Myntri ka tnad Tourism, u bah Paul Lyngdoh ki la pyllait ruh ia ka autumn tourism calendar, kaba kynthup ia ki tarik na ka bynta ka Shillong Literary Festival kaba la ap khmih lynti bha ka ban long ha ka 12-14 tarik u Naiwieng, Shillong Cherry Blossom Festival ha ka 15-16 tarik u Naiwieng, Me’gong Festival ha 29-30 Naiwieng, ka The Hills Festival ha ka 6-7 tarik Nohprah, u Bryan Adam India Tour ha ka 10 tarik Nohprah bad Winter Tales ha ka 12-14 tarik Nohprah, nalor kiwei pat.

Shuh shuh la pynbna ruh halor ka jingiatreilang bad ka Japan kum ka paralok na ka bynta ka Shillong Cherry Blossom.Shibynta jong kane ka sienjam, yn thaw ia ka Japan Zone ka ban pyni ia ka jingpher bad ka kolshor ba riewspah ka Japan.