Pynbna u CM Conrad ban sdang iaka patient management system, ioh appointment 425 ngut ki doktor specialist

Syllad | The Rising MeghalayaMarch 8, 2024

U Myntri Rangbah ka jylla u Conrad K Sangma haka 7 tarik u Lber u la sam ki shithi thungkam sha ki 425 ngut ki  junior specialists, medical officers bad dental surgeons, kiba dang rungkam thymmai ha ki jaka ai jingsumar bapher bapher.

Ïa ka jingïalang jong kane ka jingsam ïa ki shithi thungkam la pynlong ha State Convention Centre, Shillong haka jingiadonlang ka Myntri ka tnad ka koit ka khiah ka Dr. Ampareen Lyngdoh bad u Myntri ka tnad PHE u Marcuise N Marak.

Ha ka jingai khublei ïa kine kiba lah pule pyntbit ha ka medical, u Myntri Rangbah u la kyntu ïa ba kin trei shitom bad len lade ban shakri ïa ka imlang ka sahlang.

“Kane ka jingthep kam kaba la pyndep da ka sorkar ka dei kaba khuid bad suba. Phi don hangne mynta namar ka hok jong phi. Phi dei kiba kynsai tam bad phi lah leh bha ha ki eksam,” la ong u Myntri Rangbah.

Haba kren halor ka jingeh ba ïakynduh ba ïadei bad ka jingpynrungkam ha ki tnad sorkar bapher bapher, u Myntri Rangbah u la ong, “Ngi lah phiah halor ka jingpynrung kam na ka bynta ka tnad pule puthi bad ka koit khiah, kaba la kham pynsuk ka rukom treikam. Ha ki por ba la dep kane ka jingpynrung kam ka suki bha bad ka don ruh ka por ba ka bampor haduh hynriew snem. Ka jingshim rai ban thung iaka arecruitment board na ka bynta ka tnad pule puthi bad ka tnad ka koit khiah ka dei kaba la kham pynsuk bad kloi ha ka jingpynrung kam bad lah ban pynrung bujli ki jaka ba thylli.”

Halor ka jingpynkhlaiñ pat ha ki tnad treikam ka koit ka khiah, u Myntri Rangbah u la pynpaw ba ha ka jingphiah percentage, ka koit ka khiah ka dei kaba lah buh hakhmat hapdeng ba mang 8 percent na ka mangtyngka jong ka jylla. “Ka mang tyngka na ka bynta ka tnad ka koit ka khiah ka dei kaba heh tam ha ka ri, kumba ba ngi don jingthmu ban pynkhlaiñ bad ai jingshakri bapura ha kane ka liang”, la pynpaw u Myntri Rangbah.

Ula pyntip ba ki don bun ki sienjam kiba lah sdang ha kaba ïadei bad ka koit ka khiah, u la ong, “ka dei ka jingtynjuh kaba khraw hakhmat jong ngi, hynrei hapdeng ba ngi shim ïa ka kum ka kamram wat lada bun ki jingtynjuh ki lad ki lynti ki don, ngin bteng ban thom shakhmat ban nangpynjanai ka jingai jingshakri halor ka koit ka khiah ha ka jylla.”

U lah pyntip ruh ba la shna ïa ki ïingsah  ba lah ruh ban treikam, ha kylleng ki jaka jong ka jylla na ka bynta ki doctor bad kiwei de, khnang ba kine ki ïing ba shong bad treikam ki nongsumar kin don wat sha ki jaka ba kham kyndong jong ka jylla ban pynsuk ïa ki nongtrei sorkar ha ka jingtreikam jong ki. “Ha ka jaka ban don la kajong kajong ka mala jong ki tnad treikam bapher bapher, ka sorkar ka don jingmut ban shna ki mala bad lah ban sah ki doctor, engineer bad kiwei de ki nongtrei kam sorkar”.

U la ban bad ong ba lait na ki district headquarter ban shna kine ki  ïingsah jong ki nongtrei sorkar yn pyrshang ban shna ruh sha ki jaka ba kham kyndong na ka bynta ki doctor, ki nurse bad kiwei de ki dkhot nongtrei sorkar. “Yn ym lah satia ban pyntreikam mardor ha kylleng ki jaka hynrei ka sorkar ka thmu ban sdang noh naphang naphang ha ka jingshna kine ki ïing.”

U lah pyntip ruh ba kine ki snem  ban wan, ki  PHC bad CHC,  kynthup ki hospital ha kylleng ka jylla kin ïohi ki mala bathymmai. “Kane ka kam ka lah ïaid shakhmat bad ha kane samoi treikam jong ka sorkar, ngin sa lah ban pyndep bad kyntiew ki mala jong ki jaka ai jingsumar”.

U lah ong ruh ba ha kine ki khyndiat taïew ban wan yn sa sdang ïa ka patient management system ha ka jylla kaba lah ban khmihbniah halor ki nongpang kiba don hapdeng ka jingshah sumar ha ki jaka ai jingsumar bapher bapher.

“Ngi la dep ban pyrshang ïa kane ha Ribhoi district bad kane kajuh yn sa sdang ha baroh kawei ka jylla. Kane ka long kawei na ki jingpyntreikam ba kham pher, ba lah shimkhia da ka sorkar bad ngin sa long kawei napdeng ki khyndiat tylli ki jylla havka ri ban wanrah kum kane ka mat pyntreikam,” la ong u Conrad.

Kane ka  patient management system kan plie lad ïa ka sorkar ba kan long kaba la pynkhreh bad ban ithuh lypa ki jait jingpang ba kham kynthei bad shim ki sienjam ba dei pat ha ka por kaba biang.

 “Ka jingpyndonkam da ki technology kan long kaba hakhmat ha kine ki  sngi ban wan bad ngi pyrshang ban ïaïaid ryngkat bad ki atiar katkum ka por bad ka juk kaba mynta”.