Pynbna u CM ia ka jingiarap ba T.50 lak ban tei ia ka Karbi Cultural Centre

Syllad | The Rising MeghalayaApril 4, 2025

U Myntri Rangbah ka Jylla u Conrad K. Sangma ha ka 3 tarik Iaiong u la iashim bynta ha ka jingrakhe Golden Jubilee jong ka All Meghalaya Karbi Association (AMKA) ha ka shnong Purduwa Kharpati, Ri Bhoi District ha kaba u la pynbna ban ai ia ka song jingiarap kaba T.50 lak ban shna ia ka Karbi Cultural Centre.

Haba kren ha ka jingialang u CM u la pynkynmaw ia ka jingnoh synniang jong kiba bun ki nongialam Karbi, kata kum u (L) Valerian Hing Timung, (L) Jaipo Thang Taro, Dominic Timung, Joy Taro bad u Chikraw Timung kiba don bynta ha ka jingialeh jong ka Meghalaya ban ioh ia la ka jong ka jylla.

“Ki kyrteng jong ki, ki dang iai sah bad ngi haduh mynta bad ngin ym klet ia ka jinglen lade ka jong ki. Ki nongialam Karbi jong ngi ki la pynlut ia ka por da ki bun bun bnai hapoh ki phatok ban iakhun na ka bynta ban pynioh ia ka jylla ka jong nga, kaba pynpaw ia ka jingiadei kaba khlain hapdeng ki paid Karbi bad ka Meghalaya,” u la ong.

Haba ai khublei ia ki dkhot ka AMKA, u CM u la ai ka jingithuh ia ka jingnoh synniang jong ki nongseng kane ka kynhun kiba la trei ha kine ki 50 snem ban pynneh pynsah ia ka kolshor ba riewspah jong ki nongshong shnong Karbi.

Haba kren halor ka histori bad ka jingialong shipara kaba don hapdeng ki jaidbynriew riewlum bapher bapher ka jylla, u Conrad u la ong, “Ngi lah ban don ka jingiapher ha ka jingdon ki jaidbynriew kiba kham heh paid, hynrei kular ia baroh ki nongshong shnong ka jylla jong ngi, khlem da khein na kano ka jaidbynriew, na kano ka jait niam kaba phi ngeit..ban don ha Meghalaya bad long ki nongshong shnong ka Meghalaya ka pynlong ia phi kiba kongsan kumjuh hakhmat jong ngi..bad ka dei ka kamran jong uwei pa uwei u nongialam bad ka sorkar ban pynthikna ba baroh ki kam pynroi bad ki lad jingiada bad ki hok la pynioh sha baroh ki nongshong shnong kiba shong ba sah ha Meghalaya.”

Nalor kata haba pynpaw halor ka jingdonkam ban pynneh ia ki kynhun jaidbynriew bapher bapher bad ia ka kolshor, u CM u la u la pynpaw ba na ka liang ka sorkar ka la bteng ban aijingkyrshan ia ki kynhun rit paid bapher bapher ha ka jylla na ka bynta ban pynneh pynsah ia la ka kolshor bad ki jingleh jingkam tynrai.