Pynbna u CM ia ka project ban pyniasoh ia ki shnong ba pajih da ki jingkieng doidoi

Syllad | The Rising MeghalayaMarch 29, 2025

U Myntri Rangbah ka Jylla u Conrad K Sangma ha ka 28 tarik Lber u la pyntip ba ka sorkar ka don ia ka jingthmu ban wanrah da ka project ka ban pyniasoh ia kiba bun tylli ki shnong kiba pajih lyngba ki jingkieng doidoi.

“Ki don shibun ki shnong ia kiba la pyniakhlad da ki wah. Ka sorkar ka la pynwandur ia ka project kaba la bei tyngka da ka World Bank ka ban pyniasoh ia ki shnong ha ka jylla, ha kaba yn shna da ki jingkieng doidoi,” ong u CM haba plie ia kawei na kiba kum kine ki jingkieng ha Dombagre ha Dalu block, West Garo Hills.

Kane ka jingkieng kaba jrong 80 mitar ba la shnong halor jong ka wah Bandra ka dei kaba pyniasoh ia ka surok Sesengpara Kherapara sha ka shnong Dombegre bad ka ban ai jingmyntoi ia palat 2000 ngut ki nongshong shnong jong ka thain.

Ia kane ka jingkieng la shna ha ka jinglut kaba kot T.2.08 klur. La pyntrei ia kane ka jingkieng hadien ba ka jingkieng dieng kaba rim ka la julor bad shah rong ha ka jingshlei um kaba la jia ha u snem 2022 ha ka thain Dalu.

“Kane ka jingkieng ka la pynduna ia ka jingjngai haba iaid kjat da haduh 11 km,” u la ong haba pynpaw ba kane ka jingkieng kan long da shisha ka jingkyrkhu kaba khraw ia ki paidbah.

Ha kajuh ka por u la shim ruh ia ka kabu ban pyntip sha ki paidbah ba katba kane ka jingkieng doidoi ka dei ka lynti ba shipor ban weng ia ki jingeh jong ka shnong, ka sorkar shen kan sa wanrah ia ka project ban tei syndon da ka jingkieng dewbilat. U pyntip ruh ba ka sorkar ka la trei borbah ban pynthikna halor ka roi ka par ha ka jylla hi baroh kawei.

Ha ka jingleit jurip sha Dalu, u Conrad u la iakynduh ruh ia ki doktor bad ki nonghikai jong ki jaka pule bapher bapher kiba hapoh Dalu block bad sngap ia ki jingeh kiba ki iakynduh. Na ka liang ki sengbhalang bad ki paidbah ruh ki la aiti ia ki dorkhas ban pynbha ia ka CHC, PHC ha ka thain kynthup ka jingkyrpad ban wanrah ia u tower mobile.

Nalor kata u CM u la pynsngap ruh ia ki jinsngewkhia jong ki paidbah ia kiba la pynsngew ha ka prokram kaba long shibynta jong ka CM Connect, kaba dei ka sienjam ba la shim da u CM ban pynsngap bad ban weng ia ki jingeh jong ki paidbah.