Pynbna u CM ia ka song ba T.15 klur sha ka Seng Khasi ban tei ia ka Indigenous Cultural Centre

Syllad | The Rising MeghalayaApril 7, 2025

U Myntri Rangbah ka Jylla u Conrad K Sangma haka sngi 7 tarik Iaiong u la pynbna ia ka song pisa kaba T.15 klur na ka bynta ban tei ia ka Indigenous Cultural Centre ha Mawkhar.

Ia kane u CM u la pynbna ha ka sngi pynkut ia ka Shad Suk Mynsiem ba lai sngi ba la pynlong da ka Seng Khasi Kmie ha Madan Weiking.

Haba kren sha ki lad pathai khubor, u CM u la ong, “Kumba ngi ju pynpaw halor ka jingdonkam ban pynneh pynsah bad ban kyntiew ia la ki kolshor bad ki riti dustur tynrai kumta ruh ngi donkam ban don ia ka Indigenous Cultural Centre.

“Ha u bnai Jymmang u ban wan ngin buh noh ia u mawnongrim na ka bynta kane ka jingtei ba la mang da ka sorkar ha ka jinglut kaba T.15 klur. Ngi la dei ban buh mynta u bnai hynrei kumba baroh ngi ia tip kam long kaba iahap mynta u bnai kumta ngi la pynkynriah noh,” u la bynrap.

U Conrad u la ong ruh ba u sngewkmen shibun ba na ka liang ka sorkar ha kaba khatduh ka la lah ban pynurlong ia kane ka jingdawa kaba la slem jong ka Seng Khasi.

U la ong ba na ka liang ka sorkar ruh ka ai ka jingkyrshan kaba pura na ka bynta ban tei ia ki jingtei bapher bapher kiba iadei bad ka kolshor, kata naduh ki jingtei kiba heh haduh kiba kham rit.

Nalor kata u la bynrap ruh ba kane ka Indigenous Cultural Centre ha Mawkhar kan dei ka project ia kaba yn tei da kaba pynshong nongrim janai katkum ka jingstad teknoloji kaba mynta.

Ha kajuh ka por u Conrad u la ong ruh ba u don ia ka jingsngew shimet jong u na ka bynta ban shna pynbha ia ka madan bad ban pynheh ia ka jaka shong paidbah namar la sakhi ruh ia ka jingwan tuid jong ki nongwan jngohkai pyrthei na kylleng sha kane ka madan ban sakhi ia kane ka shad ka kmen tynrai. Halor kane ka bynta u la ong ba un sa iakren bad ki nongpyniaid jong ka Seng Khasi Kmie.

“Dang shen nga la don ha ka thain Karbi bad nga la pynbna ia ka song jingiarap kaba T.50 lak na ka bynta ban tei ia ka Cultural Centre. Nalor kata nga la pynbna ruh ka jingiarap na ka bynta ki jaidbynriew Rabha, ki Kooch bad Hajong,” u la bynrap da kaba kular ruh ba na ka liang ka sorkar kan dang iai bteng ban aijingkyrshan ia baroh ki kynhun jaidbynriew ha ka jingpynneh pynsah ia ki riti dustur bad ki kolshor bapher bapher.