Pynbna u CM ia ka song pisa kaba 26 klur ban pyndep ka jingtei ia ka Iawmusiang

Syllad | The Rising MeghalayaJuly 3, 2024

U Myntri Rangbah ka Jylla u Conrad K Sangma u la pynbna ia ka song jingiarap kaba T.26 klur na ka bynta ban pyndep noh ha kaba iadei bad ka jingtei ia ka Iawmusiang kaba dang sahteng ha Jowai.

Ia kane u Conrad u la pynbna haba aijingkaren ha ka sngi kut jong ka Shad Behdienkhlam ha Aitnar, Chiliangraij, Jowai ha ka 3 tarik mynta u bnai, ha kaba u la pyrto ruh ia ka jingkylluid mynsiem jong ka Seinraij Jowai halor ka jingnoh synniang ia ki jaka na ka bynta ka jingshna ia ki jaka pynieng kali ha sor Jowai.

Ha kawei pat ka bynta, haba kren sha ki lad pathai khubor shabar jong ka jingialang, u Sangma u la ong ba ka mat kaba iadei bad ka jingtei ia ka complex jong ka Iawmusiang ka dei kaba shem jingeh shibun hadien ba ka Sorkar ka la iakynduh ia kiba bun ki jingeh mynta lah buntylli ki snem.

U la ong ruh ba la sakhi ia kiba bun ki jingeh ha kaba iadei bad kane ka projek ban tei ia ka complex jong ka Iawmusiang, hynrei, “Nga sngewkmen shibun ba ngi la shim ia ka rai kum ka sorkar ban iakhun pyrshah ia baroh kine ki jingeh.”

Na ka liang u CM u la pyntip ruh ba ia kane ka mangtyngka kaba 26 klur yn bei beit pura da ka sorkar Jylla.

“Kane ka dei ka project kaba kongsan na ka bynta ki nongshong shnong ka Jowai bad ka Ri Lum Jaintia hi baroh kawei, bad kane ka project ka don ruh ia ka jingiadei kaba jan bha ha ka mynsiem jong nga namar ka dei ka sienjam ban shim da i pa jong nga u (L) Purno A Sangma, bad kumta ngi don ia ka jingkut jingmut kaba skhem ban pyndep ia ka,” ong u Conrad .

Nalor kata u la ong ruh ba u khmih lynti ba ka jingpyndep ha kaba iadei bad ki tender kan shimpor kumba ar ne lai taiew bad ki kyrmen skhem ba ia ka work order yn ai sha ki kontraktor hapoh jong ka ar bnai.