Pynbna u CM ka jylla ia ki lad jingiarap pynioh kam nos sha kylleng ki ri 

Syllad | The Rising MeghalayaAugust 4, 2023

U Myntri Rangbah ka jylla u Conrad K Sangma u la pynbna halor ka jingkut jingmut jong ka sorkar ban shim ia baroh ki lad jingiarap ban aijingkyrshan na ka bynta ki nos kiba la shah pyntbit ban ioh kam sha kylleng ki ri ka pyrthei.

Haba kren ha ka ‘overseas nursing job fair’ ha Shillong mynta ka sngi, u CM ula kdew halor ka jingangnud jong ka sorkar ban aijingkyrshan ia ki nos na ka bynta ban ioh kam ioh jam shabar ka jylla bad ka ri.

Ia kane ka ‘overseas nursing job fair,’ la pynlong ha ryngkat ka jingiatreilang bad ka Navis HR Pvt Ltd, Nursedge, The Trained Nurses Association India, bad ka Ajith Enterprise da ka Meghalaya State Skill Development Society bad ka Department of Health and Family Welfare, ka sorkar Meghalaya.

Na ka liang u CM Conrad Sangma u la ban ruh halor ka jingdonkam ia ki lad jingpule bapher bapher bad pynpaw ruh ia ka jingthmu jong ka sorkar ban plie ia kajuh ka kabu ha ki bynta bapher bapher jong ki jingtreikam.U la kdew ruh ba kane ka sienjam kan plielad na ka bynta ki samla wad kam na ka jylla Meghalaya. U la ong ruh ba ka sorkar kan plie ruh ia ki lad ki lynti ioh kam ha kiba bun ki liang, kata la ka long ha ka liang ka put ka tem, ka koit ka khiah, ki jingtei bad kiwei pat.

Haba kren halor ka jingjop lyngba kine ki lain jingpule, u CM u la pynpaw ha ki sienjam ba la shim da ka sorkar halor kane ka bynta ka la kyntiew ha kaba iadei bad ki lad ioh kam hapdeng ki samla.Nalor kata u la kdew ruh halor ka jingseisoh ha kaba iadei bad ka jingdonkam haduh kumba 500 ngut ki doktor lyngba ka medical recruitment board tang hapoh jong ka ar bnai.