Pynbna u Conrad ban pyntbit iaki samla, buh thong ban phah 1000 ngut sha Japan, Singapore & United Kingdom
U Myntri Rangbah ka Jylla u Conrad K Sangma ha ka 26 tarik Naitung u la ong ba ka sorkar Jylla ka la ialeh ban pyndap ia ka jingduna hapdeng ka jingdawa bad pynbiang nongtrei na ka bynta ki kam kiba shabar jong ka ri da kaba pynrung kam ia ki samla hapoh ki tnad kiba lah ban shaniah.
U la ong, “Kum ka sorkar ngi la tuklar ban pyniasoh ia ki samla jong ngi bad ki tnat treikam ne agency bapher bapher. Ngin sa bei tyngka na ka bynta ki kam aijinghikai ka ban long T.50,000 ban kyrshan ia ki ha ka jingiaid lynti ba kin ioh kam shabar jong ka ri, bad ruh ban pynsuk na ka bynta ia ki Visa bad kiwei kiwei ki jingdonkam kiba iadei bad ki kot ki sla,” ong u CM haba kren hapdeng ki samla ha ka ‘Job Fair’ na ka bynta ban ioh lait trei shabar ia kaba la pynlong hapoh District Auditorium Tura, West Garo Hills.
![](https://www.syllad.com/wp-content/uploads/2024/09/JIT-Vacancy-823x1024.avif)
U CM u la ong ba ka sorkar ka la shim ia ka rai ban aijingkyrshan ban pynrung kam shabar jong kari namar ba ka don ka lad ha ki ri kiba la kiew namar ka jingbun jong ki briew kiba la noh rta. “Lada ngin lah ban phah 1,000 ngut ki samla sha ki ri kum sha Japan, Singapore bad UK kin ioh la kumno kumno kumba T.1.2 lak shi bnai, bad ba kin lah ban kynshew ia ka pisa bad ka ban iarap ban kyntiew ia ka jingioh pisa bar ri jong kane ka jylla jong ngi,” u la ong.
“Ka jingdon kiba bun ki nongshong shnong kiba la noh rta ha kito ki ri kiba la kiew shaphrang ka la nangkiew bad kim don ia ki samla kiba biang ha ki jingtrei jingktah. Katba ka India ka dei kaba don bun eh ki briew kiba dei ki samla ha ka pyrthei bad kiba dang kham samla tam ha ka jylla Meghalaya ka don ia ka lad ban weng ia kane ka jingduna da kaba phah ia ki samla kiba la pynkhreh bad pyntbit ban ioh kam ban trei ha kine ki ri hadien ba ki la shah pyntbit bad ioh jingkyrshan ha kaba iadei bad ka jingpynbiang ia ki kot ki sla na ka sorkar,” bynrap u CM.
Haba kren halor ka jingleit jurip ka jong u sha Japan, u Conrad u la ong, “Arngut ki nos na Meghalaya kiba la trei ha Kobe, Japan ki la pynpaw ia ka jingkmen halor ka jingioh lad ban trei hapoh kane ka ri. Nga la iakynduh da lade hi ia ki ha Kobe bad Nga la iakynduh ruh ia ki nongpyniaid jong ka hospital. Tang kane ka hospital ka donkam haduh kumba 700 ngut ki nos man la u snem. Ki donkam ia ki nongtrei kiba dang samla namar ba kane ka ri jong ki ka la ngat ha ka jingkyrduh ha ka jingdon ki samla ki ban trei ha ki kam bapher bapher.”
“Ka don ka jingdawa kaba jur bha ym tang ha kaba iadei bad ki Nurse ha ka liang ka koit ka khiah, hynrei kumjuh ha kiwei pat ki liang, kum ka jingpynpoi marbam, ha ki kad liengsuiñ, ka tem ka put bad kiwei kiwei,” ong u CM da kaba pynpaw ba ki samla jong ka jylla jong ngi ki lah ban shim kabu.
Ha kine ki khyndiat bnai ban wan, 27 ngut ki samla na kane ka jylla yn sa leit buh sha Japan, 44 ngut ha Singapore, bad 50 ngut ha UK ha ka kam kaba iadei bad ki lad jingsumar.
Haba pynpaw ia ka jingsngewkhia bad halor ka jingsheptieng bad ka jingbym jingshaniah, u Conrad ula ong ba ka Meghalaya Skill Development Society (MSSDS) bad ka tnad Labour, Employment & Skill Development Society kila shah pynkhamti ia ka kam ban wad ia ki Agency kiba biang na ka bynta ki jingai jinghikai, kumjuh ka jingai jinghikai ban nang ia ka ktien ka thylliej ryngkat bad ki pynioh kam ioh jam.
Shuh shuh u CM u la ong, “Ki samla jong ngi ki lah ban shaniah ha kine ki Agency kumba ngi la dep ban ithuh ia kiba bha tam, kumta kam dei ban don kano kano ka jingtieng jingsyier. Ngi buh hakhmat eh ia ka jingshngain jong ki nongshong shnong jong ngi bad ngin pynthikna ba kin ioh ia ka kamai kajih kaba don jingmut.”
Leave a Reply