Pynbna u Conrad iaki kam pynroi haka CM-Connect ha Nongstoin

Syllad | The Rising MeghalayaDecember 4, 2024

U Myntri Rangbah ka jylla u Conrad K Sangma ha ka 3 tarik Nohprah u la ong ba ka CM-Connect ka dei ka sienjam kaba biang tam na ka bynta ka Sorkar ba kan lah ban weng ia ki jingeh kiba ki paidbah nongshong shnong ki iakynduh.

Ia kane u CM u la pynpaw haba shah shkor ia ki jingeh bad ki mat bapher bapher ba la pynsngew da ki nongialam shnong lyngba ka prokram CM-Connect kaba la pynlong ha Nongstoin, West Khasi Hills ha ka jingiadon lang u MLA ka Nongstoin u Bah Gabriel Wahlang, MLA ka Mawshynrut Bah Methodious Dkhar, u MLA ka Rambrai Jyrngam u RG Momin, ki ophisar sorkar kynthup ia ki nongialam na ki shnong bapher bapher kiba hap hapoh ka Nongstoin C&RD block.

Na ka liang ki nongialam shnong ki la ioh ban pynpaw halor kiba bun ki jingeh ha ki shnong ki thaw, kata kaba kynthup naduh ki lynti surok, ki jaka aijingsumar, ki jaka pule puthi, ki kam jngohkai, ka jingkyntiew ia ki kam ialehkai sports bad kiwei kiwei ki kam pynroi.

Halor ki jingeh kiba iadei bad ka koit ka khiah u Myntri Rangbah ula ong ba ka sorkar ka dang pyrshang ban kyntiew ia ki jaka ai jingsumar kiba la don lypa khnang ban lah ban ai ka jingshakri kaba kham bha bad ruh ban kyntiew noh ia ka Nongstoin Civil Hospital.

Ha kaba iadei bad ka jingdawa ban pynioh ia ka madan ialehkai ha ka shnong Mawthungkper bad ban plie ia ki jaka aijinghikai bapher bapher na ka bynta ki samla, u Conrad u pyntip ba na ka liang ka sorkar ka la mang T.10 klur na ka bynta ka jingshna ia ka madan ialehkai artificial turf.

Halor ka jingkyrpad ban pynduna ia ka sut na ka bynta ki SHG, u Myntri Rangbah ula ai ka jingkular ba un shimkhia ia katei ka kam bad ka Myntri ka Sorkar pdeng kaba khmih ia ka pla tyngka ka Nirmala Sitharaman.

U Myntri Rangbah u la pynbna ruh ha kaba iadei bad ka jingpynkhreh ban shna noh shen ia ka surok na Maweit sha Nongjri ha kaba ia ka mang tyngka la khmih lynti ban pyllait ha kine ki lai bnai ki ban wan. “Kane kan long ka kabu kaba khraw ban plie ia ki jaka khappud ki jong ngi na ka bynta ki kam khaii pateng bad ki ri kiba shabar khamtam na ka bynta kane ka thain lyngba kane ka surok,” u la ong.