Pynbna u Dolloi Amwi ba u Lephing Pyrtuh u Waheh Shnong ka Sohmynting

Syllad | The Rising MeghalayaSeptember 15, 2019

JOWAI: U Dolloi ka Elaka Amwi u Ma J Pyrtuh ula pynbna paidbah ba u ma Lephing Pyrtuh udei u Waheh jong ka shnong Sohmynting hadien ba ula jop ïaka elekshon jied Waheh Shnong kaba long haka 13 tarik une u bnai haka shnong Sohmynting, West Jaiñtia Hills District.

Ki nongshong shnong jong ka Sohmynting da kawei ka sur kila pynjop don burom ïa u ma Lephing Pyrtuh haka jingjied (election) Waheh Shnong. U Ma Lephing ula ioh vote haduh 912 bad u Ma Bravestar Phawa ula ioh vote 539 na ka 1454 vote.

Ha kane ka jingjied Waheh Shnong kaba la hap ban pynlong arsien la wan ban sakhi da ki dkhot jong ka Village Court jong ka Elaka Amwi, ki Officers ka JHADC bad ki bor Pulit.

U Dolloi ka Elaka Amwi u ma J Pyrtuh hadien ka jingniew ula pynbna ba u ma Lephing Pyrtuh ula shah jied kum u Waheh Shnong ka Dorbar Shnong Sohmynting.

Kane ka kam jied Waheh Shnong ha ka Sohmynting la hap ban pynlong arsien bad la hap ruh ban pyndam ar tylli ki jingpynbna jong ka Executive Committee ka Jaiñtia Hills Autonomous District Council (JHADC).

Ha ka jingjied Waheh Shnong thymmai kane ka shnong kaba long haka 18 tarik u Iaiong ka Dorbar Shnong kala jied ïa u ma Lephing kum u Waheh Shnong, hynrei ki 68 ngut ki paid nongshong shnong bad u ma Bravestar Phawa kila ujor sha ka konsil bad kynnoh ba leh bor u Dolloi bad pyrshah ïaka rai shnong ban jied kam Waheh Shnong tang ïaka jait kur Pyrtuh.

Ka JHADC kala thung Acting Waheh Shnong ha katei ka shnong da u Bravestar Phawa bad hadien ka jingpyrshah u paid nongshong shnong kala hap ban pyndam ïaka hukum kaba kala pynmih haka 1 Nailar 2019 (No.JHADC/POL/33/2007/53).

Ka JHADC kala pynmih biang da kawei ka hukum ba kala ithuh ïa u Lephing Pyrtuh kum u Waheh Shnong ba pura jong ka Sohmynting katkum ka jingpynbna (No.JHADC/Pol/33/2007/61 Dated 16 Nailar 2019) katkum ka jingpynskhem jong u Dolloi ka Elaka Amwi haka 23 Iaiong 2019.

Hynrei ïa kane ka hukum No.JHADC/Pol/33/2007/61 ruh ka Executive Committee JHADC kala pyndam bad pynmih ïaka hukum bad rai ban pynlong elekshon biang namar ba ki nongujor kila dawa ban pynlong da ka elekshon.

Dei ha kane elekshon kaba la hap ban pynlong biang ka sur jong u paidbah kala jop bad kala pynjop don burom ïa u ma Lephing Pyrtuh kum u Waheh Shnong ka Dorbar Shnong Sohmynting.